ဘာစီလိုနာနည်းပြ ဟန်ဆီဖလစ်ခ်က ဂီတာဖေးနှင့်ပွဲတွင် မိမိတို့အသင်း အဆုံးသတ်ပိုင်းအားနည်းခဲ့ကြောင်း ဝန်ခံပြောကြားခဲ့သည်။
၂၀၂၅ ခုနှစ်တွင် ကစားသည့်ပွဲစဉ်များ၌ ဘာစီလိုနာအသင်းသည် စပိန်စူပါဖလားတွင် ရီးယဲလ်ကို (၅-၂) ဂိုး၊ စပိန်ဘုရင့်ဖလားတွင် ဘက်တစ်ကို (၅-၀)ဂိုးဖြင့် အနိုင်ရခဲ့သော်လည်း စနေနေ့က ကစားခဲ့သည့် ဂီတာဖေးနှင့် လာလီဂါပွဲစဉ်တွင် ဂိုးရရန် ရုန်းကန်ခဲ့ရသည်။
ဘာစီလိုနာအသင်းသည် ဂီတာဖေးနှင့် (၁-၁)ဂိုးဖြင့် သရေကျသည့်ပွဲတွင် ဂိုးကန်သွင်းခွင့် (၂၁) ကြိမ် ရရှိခဲ့သော်လည်း (၁) ဂိုးသာ ရရှိခဲ့သည်။ ထို့ကြောင့် ဘာစီလိုနာနည်းပြ ဟန်ဆီဖလစ်ခ်က ၎င်းတို့အသင်းအနေဖြင့် အဆုံးသတ်ပိုင်းအားနည်းခဲ့ကြောင်းပြောကြားခဲ့ခြင်းဖြစ်သည်။
ဟန်ဆီဖလစ်ခ်က “အနိုင်ရနိုင်တဲ့ အခွင့်အရေးတွေ ရခဲ့ပေမဲ့ အသုံးမချနိုင်ခဲ့လို့ ကျွန်တော်တို့ စိတ်ပျက်ရပါတယ်။ ဂီတာဖေးခံစစ်ကစားတာ ကောင်းတာမှန်ပေမဲ့ ကျွန်တော်တို့အနေနဲ့ ဂိုးရှေ့မှာ အဆုံးသတ်ပိုင်း သေချာမှု မရှိခဲ့ပါဘူး”ဟု ပြောကြားခဲ့သည်။
