ပရီးမီးယားလိဂ်ကလပ် ဗီလာအသင်းအားပေးသူ ပရိသတ်များသည် ဗီလာအသင်းခေါင်းဆောင် ဂရီးလစ်ရှ်အား ခေါ်ယူရန်ကြိုးပမ်းနေသည့် မန်စီးတီးအသင်းကို ဒေါသထွက်နေကြပြီး လှောင်ပြောင်အော်ဟစ်မှုများ ပြုလုပ်ခဲ့ကြကြောင်း သိရသည်။
ဂရီးလစ်ရှ်အားခေါ်ယူရန် ပရီးမီးယားလိဂ်ချန်ပီယံ မန်စီးတီးအသင်းက ဗီလာအသင်းအလိုရှိနေသည့့် ပြောင်းရွှေ့ကြေး ပေါင်သန်း(၁၀၀)ဖြင့် ကမ်းလှမ်းထားပြီး ဗီလာအသင်းကလည်း ယင်းကမ်းလှမ်းမှုကို လက်ခံဖွယ်ရှိနေ၍ ၎င်းအနေဖြင့် ဗြိတိန်စံချိန်တင်ကြေးဖြင့် မန်စီးတီးအသင်းသို့ ရောက်ဖွယ်ရှိနေသည်။
ဂရီးလစ်ရှ်ကိုယ်တိုင် မန်စီးတီးအသင်းသို့ ပြောင်းရွှေ့ကစားလိုနေသော်လည်း ဗီလာပရိသတ်များကမူ ၎င်းတို့၏ ငယ်မွေးခြံပေါက်ကစားသမားဖြစ်သူ ဂရီးလစ်ရှ်အား ဆုံးရှုံးမခံလိုဘဲ မန်စီးတီးအသင်းအား စိတ်ဆိုးနေကြသည်။
သို့ဖြစ်ရာ ကလပ်အသင်း၏ ရာသီကြိုခြေစမ်းပွဲဖြစ်သော ဘရစ္စတိုးလ်စီးတီး(၀-၃)ဗီလာပွဲတွင် ဗီလာပရိသတ်အချို့က မန်စီးတီးအသင်းကို လှောင်ပြောင်တိုက်ခိုက်သည့် အော်ဟစ်မှုများ ပြုလုပ်ခဲ့ကြကြောင်း သိရသည်။
ပြီးခဲ့သည့်ဇူလိုင်(၃၁) ရက်နေ့က ဘရစ္စတိုးလ်စီးတီးအသင်း၏ အိမ်ကွင်းဖြစ်သော အက်ရှ်တန်ဂိတ်ကွင်းတွင် ယင်းခြေစမ်းပွဲကစားခဲ့ရာ ပွဲကြည့်စင်ပေါ် ၌ ဗီလာပရိသတ်များက မန်စီးတီးအသင်းအား ရည်ရွယ်၍ ”အဲဒီပေါင်သန်း(၁၀၀)ကို မင်း –င်ထဲ မင်း ပြန်ထိုးထည့်ထားလိုက်”ဟု သံပြိုင်အော်ဟစ်ခဲ့ကြကြောင်း သိရသည်။
ဗီလာအသင်းက အဝေးကွင်းတွင် (၃)ဂိုးပြတ်နိုင်ခဲ့သည့် ယင်းခြေစမ်းပွဲသို့ ဗီလာပရိသတ်(၁၅၀၀)ခန့် လိုက်ပါအားပေးခဲ့ကြကြောင်း သိရသည်။
သို့သော် ယင်းပွဲကစားရာ အက်ရှ်တန်ဂိတ်ကွင်းတွင် ဂရီးလစ်ရှ်မှာမရှိခဲ့ဘဲ ယင်းပွဲ၌လည်း မပါဝင်ခဲ့ကြောင်း သိရသည်။
ဂရီးလစ်ရှ်သည် အသက်(၆)နှစ်အရွယ် ၂၀၀၁ ခုနှစ်ကတည်းက ဗီလာအသင်းသို့ ရောက်ရှိလာသူဖြစ်ပြီး ၂၀၁၄ ခုနှစ်တွင် ဗီလာအသင်းကြီး၌ စတင်ပွဲထွက်ကစားခွင့်ရရှိခဲ့သည်။
ဂရီးလစ်ရှ်သည် ဗီလာအသင်းအတွက် (၈)ရာသီအတွင်း ပြိုင်ပွဲစုံပွဲပေါင်း(၂၁၃)ပွဲကစားပေးခဲ့ပြီး သွင်းဂိုးစုစုပေါင်း (၃၂)ဂိုး သွင်းယူပေးခဲ့သည်။
