အက်သလက်တီကိုအသင်း တာဝန်ရှိသူများသည် ဂရီးဇ်မန်းအား အပြီးသတ်ခေါ်ယူလိုခြင်း မရှိသည့်အတွက် အသင်းနည်းပြ ဆီမြွန်နီအား ယခုရာသီတွင် ပွဲ (၅၀)ရာခိုင် နှုန်းသာအသုံးပြုရန် ညွှန်ကြားထားသဖြင့် ဘာစီလိုနာအသင်းအနေဖြင့် ဂရီးဇ်မန်းအား မရောင်းချနိုင်မည်ကို စိုးရိမ်နေကြောင်း Sport က ဖော်ပြခဲ့သည်။
အသက် (၃၁) နှစ်အရွယ် ပြင်သစ်တိုက်စစ်ကစားသမား ဂရီးဇ်မန်းသည် ၂၀၁၉ တွင် အက်သလက်တီကို ပရိသတ်များ တားဆီးနေသည့်ကြားမှ စာချုပ်လျော်ကြေး ယူရိုသန်း (၁၂၀)ဖြင့် ဘာစီလိုနာအသင်းထံသို့ ပြောင်းရွှေ့ ခဲ့သည်။
သို့သော် ဂရီးဇ်မန်းသည် ဘာစီလိုနာအသင်းတွင် ခြေစွမ်းမပြနိုင်ခြင်းကြောင့် ၂၀၂၁ နွေရာသီတွင် (၂)ရာသီ အငှားဖြင့် အက်သလက်တီကိုအသင်းသို့ ပြန်လည်ပြောင်းရွှေ့လာခဲ့ပြီး ယင်းအငှားစာချုပ်တွင် မည်သည့်အခြေအနေဆိုပါက အပြီးသတ်ခေါ်ယူရမည်ဆိုသောအချက်ကိုလည်း ထည့်သွင်းထားကြောင်း သိရသည်။
Sport ၏ ဖော်ပြချက်အရ အက်သလက်တီကိုအသင်းသည် ယခုရာသီတွင် ဂရီးဇ်မန်းကို အသင်း၏ ပွဲ (၅၀) ရာခိုင်နှုန်းတွင် အသုံးပြုမည်ဆိုပါက ၂၀၂၃ နွေရာသီတွင် ယူရိုသန်း (၄၀)ဖြင့် အပြီးသတ်ခေါ်ယူရမည်ဖြစ်ကြောင်း သိရသည်။
ဂရီးဇ်မန်းသည် ပြီးခဲ့သည့်ရာသီက ပြိုင်ပွဲစုံ (၃၇) ပွဲကစားခဲ့ရာ (၅၀)ရာခိုင်နှုန်းကျော်ခဲ့ပြီး ယခုရာသီတွင် (၅၀) ရာခိုင်နှုန်းထပ်ကျော်ခဲ့ပါက အပြီးသတ်ခေါ်ယူရတော့မည်ဖြစ်သည်။
ထို့ကြောင့် အက်သလက်တီကိုအသင်းတာဝန်ရှိသူများသည် ဆီမြွန်နီအား ဂရီးဇ်မန်းကို ပွဲ (၅၀)ရာခိုင်နှုန်းအောက်သာ အသုံးပြုရန် ညွှန်ကြားထားသဖြင့် ဘာစီလိုနာအသင်းက ၎င်းအား ရောင်းထုတ်နိုင်ခြင်းမရှိဘဲ အသင်းသို့ပြန်လာမည်ကို စိုးရိမ်နေခြင်းဖြစ်သည်။
