မန်ယူအသင်း၏ အင်္ဂလန်တိုက်စစ်မှူး ဂရင်းဝုဒ်နှင့် ပတ်သက်ပြီး မန်ယူနည်းပြ ဆိုးလ်ရှား ပြောကြားခဲ့သော စကားကို အင်္ဂလန်ဘောလုံးအဖွဲ့ချုပ်(FA)နှင့် အင်္ဂလန်လက်ရွေးစင်အသင်းနည်းပြ ဆောက်ဂိတ်တို့က ဒေါသထွက်နေကြောင်း သိရသည်။
ဆိုးလ်ရှားက မိမိသည် အင်္ဂလန်လက်ရွေးစင်အသင်းတွင် ဂရင်းဝုဒ်ကို မရွေးချယ်ရန်အတွက် အင်္ဂလန်အသင်းတာဝန်ရှိသူများထံ တောင်းဆိုခဲ့ကြောင်း၊ မိမိအနေဖြင့် ဂရင်းဝုဒ်အား ပြီးခဲ့သည့်နွေရာသီကာလတစ်လျှောက်လုံး အနားယူစေရန်အလိုရှိခဲ့ကြောင်း ပြောကြားခဲ့ခြင်းဖြစ်သည်။
ထို့ပြင် အသက်(၁၈)နှစ်သာရှိသေးသော ဂရင်းဝုဒ် အိုက်စလန်နိုင်ငံတွင် ဟိုတယ်ပြဿနာဖြစ်ပွားခဲ့ရာ၌ အင်္ဂလန်အသင်းတာဝန်ရှိသူများ၏ကိုင်တွယ်ပုံကိုလည်း အံ့အားသင့်မိသည်ဟု ဆိုးလ်ရှားက ပြောကြားခဲ့သည်။
ဟိုတယ်သို့ မိန်းမငယ်(၂)ဦး ခေါ်ယူခဲ့၍ နေအိမ်သို့ ပြန်ပို့ခံခဲ့ရသော ဂရင်းဝုဒ်နှင့် မန်စီးတီးကွင်းလယ်လူ ဖိုဒန်တို့ မီဒီယာများရှေ့မှောက်သို့ ရောက်ရှိစေရန် အင်္ဂလန်အသင်းတာဝန်ရှိသူများ ပြုလုပ်ခဲ့သည့် လုပ်ရပ်ကို နားမလည်နိုင်အောင်ဖြစ်ရကြောင်း၊ အမှန်တကယ်ဆိုလျှင် မိမိတို့အသင်း၏ လူငယ်ကစားသမားများကို အကာအကွယ်ပေးခဲ့သင့်ကြောင်း ဆိုးလ်ရှားက ဝေဖန်ပြောကြားခဲ့သည်။
FA တာဝန်ရှိသူများက ဆိုးလ်ရှား၏ဝေဖန်မှုကို ဒေါသထွက်ခဲ့ပြီး ဂရင်းဝုဒ်အား ရွေးချယ်မှုတွင် ကလပ်နှင့် နိုင်ငံအသင်းအကြား ပုံမှန်အတိုင်း ပြောဆိုမှုသာရှိခဲ့သည်ဟု ပြန်လည်တုံ့ပြန်ခဲ့သည်။
