ခွာရတ်စကယ်လီယာအား စာချုပ်သစ်ချုပ်ဆိုရန် ဆွေးနွေးမှုအဆင်မပြေဖြစ်နေသည်ဆိုသော သတင်းများကို နာပိုလီအသင်း ငြင်းဆန်

နာပိုလီအသင်းသည် အသင်းတောင်ပံကစားသမား ခွာရတ်စကယ်လီယာအား စာချုပ်သစ်ချုပ်ဆိုရန် ဆွေးနွေးမှု အဆင်မပြေဖြစ်နေသည် ဆိုသောသတင်းများမှာ မဟုတ်မှန်ကြောင်း ငြင်းဆန်ပယ်ချခဲ့သည်။

အသက် (၂၂) နှစ်အရွယ်ရှိ ဂျော်ဂျီယာလက်ရွေးစင်တောင်ပံကစားသမား ခွာရတ်စကယ်လီယာသည် ပြီးခဲ့သည့် ၂၀၂၂ ကမှ ဂျော်ဂျီယာကလပ် ဒိုင်နမိုဘာတူမီအသင်းမှ နာပိုလီအသင်းသို့ ယူရို (၁၂) သန်းဝန်းကျင် ဖြင့် ပြောင်းရွှေ့လာခဲ့သူဖြစ်သည်။

၎င်းသည် နာပိုလီအတွက် ပွဲဦးထွက်ရာသီမှာပင် ခြေစွမ်းပြနိုင်ခဲ့ပြီး ပြိုင်ပွဲစုံ (၄၃) ပွဲတွင် (၁၄) ဂိုးသွင်းယူကာ ဂိုးဖန်တီးမှု (၁၇) ကြိမ်အထိ ပြုလုပ်ပေးနိုင်ခဲ့သည်။

ခွာရတ်စကယ်လီယာအနေဖြင့် နာပိုလီအသင်း စီးရီးအေ ချန်ပီယံဆုရရှိရာတွင် အဓိကနေရာမှ ပါဝင်ခဲ့ခြင်းကြောင့် ၎င်းကိုခေါ်ယူရန် ဥရောပထိပ်တန်းအသင်းကြီးများက စိတ်ဝင်စားခဲ့ကြသည်။

ထို့ကြောင့် နာပိုလီအသင်းသည် ခွာရတ်စကယ်လီယာအား နှစ်ရှည်စာချုပ်ချုပ်ဆိုရန် ဆွေးနွေးညှိနှိုင်းနေပြီး ယင်းမှာ အဆင်မပြေဖြစ်နေကြောင်း အီတလီမီဒီယာများက ဖော်ပြနေကြသည်။

သို့သော် နာပိုလီအသင်းက အဆိုပါသတင်းများမှာ လုံးဝမဟုတ်မှန်ကြောင်း ထုတ်ပြန်ကြေညာခဲ့ခြင်းဖြစ်သည်။ နာပိုလီအသင်း၏ ထုတ်ပြန်ချက်တွင် “မီဒီယာအချို့က ကစားသမားအေးဂျင့်များထံမှရသည့် သတင်းများကို ဖော်ပြနေကြကြောင်း၊ နာပိုလီအသင်းအနေဖြင့် ခွာရတ်စကယ်လီယာအား စာချုပ်သစ်ချုပ်ဆိုရန် ညှိနှိုင်းမှု အဆင်မပြေဖြစ်နေသည်ဆိုသော သတင်းများမှာ မဟုတ်မှန်ကြောင်း၊ အသင်းနှင့် (၄) နှစ်စာချုပ်သက်တမ်းရှိနေသည့် ကစားသမားကို စာချုပ်သစ်ချုပ်ဆိုရန် ကြိုးပမ်းခြင်းပင် မရှိကြောင်း” ဖော်ပြပါရှိသည်။