ချယ်လ်ဆီးအသင်းသည် လူကာကူကို မည်သို့အသုံးပြုရမှန်းမသိကြောင်းနှင့် တူဟယ်လ် အဖြေရှာတွေ့ပါက ချန်ပီယံလိဂ်တွင် ဗိုလ်စွဲနိုင်သည်ဟု ကွန်တီဆို

ချယ်လ်ဆီးနှင့် အင်တာမီလန်အသင်းနည်းပြဟောင်း အန်တိုနီယိုကွန်တီက ချယ်လ်ဆီးအသင်းသည် ၎င်းတို့အသင်း၏ တိုက်စစ်မှူး လူကာကူကို မည်ကဲ့သို့ အသုံးပြုရမှန်းမသိ ဖြစ်နေကြောင်းနှင့် ယင်းအဖြေကို တူဟယ်လ် ရှာတွေ့ပါက ချန်ပီယံလိဂ်တွင် ထပ်မံဗိုလ်စွဲနိုင်ခြေရှိသည်ဟု ပြောကြားခဲ့သည်။

လူကာကူသည် အင်တာမီလန်အသင်းတွင် ကွန်တီနှင့် လက်တွဲခဲ့ပြီး သွင်းဂိုးများစွာနှင့် အောင်မြင်မှုများစွာရရှိခဲ့သလို၊ ကမ္ဘာ့အကောင်းဆုံးစာရင်းဝင်တိုက်စစ်မှူးတစ်ဦးအဖြစ် သက်သေပြသနိုင်ခဲ့သူဖြစ်သည်။

သူသည် ချယ်လ်ဆီးအသင်းထံသို့ ကလပ်အသင်းစံချိန်တင်ပြောင်းရွှေ့ကြေးဖြင့် ပြန်လည်ပြောင်းရွှေ့လာခဲ့ပြီးနောက် ပထမဆုံး (၄)ပွဲတွင် (၄)ဂိုးသွင်းယူနိုင်ခဲ့သူလည်းဖြစ်သည်။

သို့ရာတွင် မန်စီးတီး၊ ဂျူဗင်တပ်စ်တို့နှင့် ပွဲစဉ်များအပါအဝင်နောက်ဆုံးကစားခဲ့သည့် (၃)ပွဲဆက် ဂိုးပေါက်ပျောက်ဆုံးခဲ့ပြီးနောက် ကွန်တီက ယင်းကဲ့သို့ ပြောကြားခဲ့ခြင်းဖြစ်သည်။

ကွန်တီက ”ကျွန်တော်ကတော့ လူကာကူက ဒီ့ထက်ပိုကောင်းနိုင်သေးတယ်လို့ ထင်ပါတယ်။ သူက အရမ်းမြင့်မားတဲ့ အဆင့်ကို ပြသခဲ့ပြီးပါပြီ။ ဒါပေမဲ့ အခုအချိန်အထိ သူ့ရဲ့ အကောင်းဆုံးပုံစံ မဟုတ်သေးပါဘူး။ ကစားသမားဘဝက အနားယူမယ့် အချိန်အထိ တိုးတက်နေဦးမယ့် ကစားသမားမျိုးပါ။ ပြိုင်ဘက်အသင်းတိုင်းအတွက် အန္တရာယ်အကြီးဆုံး ကစားသမားလည်းဖြစ်ပြီး ဘယ်လိုခံစစ်ကိုမဆို ဖျက်ဆီးနိုင်ပါတယ်။ ချယ်လ်ဆီးက သူ့ကို ကောင်းကောင်းအသုံးမချနိုင်သေးပါဘူး။ တူဟယ်လ် သာ ဒီအဖြေကို ရှာတွေ့ရင် သူတို့ ထပ်ပြီးဗိုလ်စွဲနိုင်ပါတယ်”ဟု Sky Sports Italia သို့ ပြောကြားခဲ့သည်။