အီတလီနာမည်ကြီးကွင်းလယ်လူဟောင်း နှင့် အီတလီကစားသမားများအစည်းအရုံံး ဥက္ကဋ္ဌ တိုမာဆီက လက်ရှိရာသီ ချန်ပီယံလိဂ်ပြိုင်ပွဲတွင် ပြင်သစ်လီဂူးကလပ်အသင်းများနှင့် ဂျာမန်ဘွန်ဒစ်လီဂါကလပ်အသင်းများ အောင်ပွဲခံနေမှုမှာ ကျန်ဥရောပထိပ်တန်းလိဂ်ပြိုင်ပွဲများမှအသင်းများထက် နားရက်ပိုရပြီး ပြင်ဆင်ချိန်ပိုများခဲ့ခြင်းကြောင့် ဖြစ်ကြောင်း သုံးသပ်ခဲ့သည်။
လက်ရှိရာသီ ချန်ပီယံလိဂ်ဆီမီးဖိုင်နယ်အဆင့်သို့ ပြင်သစ်လီဂူးကလပ်အသင်းနှစ်သင်းဖြစ်သည့် PSG နှင့် လိုင်ယွန်၊ ဘွန်ဒစ်လီဂါအသင်းနှစ်သင်းဖြစ်သည့် ဘိုင်ယန်မြူးနစ်နှင့် လိုက်ပ်ဇစ်တို့ တက်ရောက်နိုင်ခဲ့ပြီး PSG နှင့် လိုက်ပ်ဇစ်၊ ဘိုင်ယန်မြူးနစ်နှင့် လိုင်ယွန်တို့ ဆုံတွေ့မည်ဖြစ်သည်။
တိုမာဆီက ”ဘွန်ဒစ်လီဂါက ဇွန်လ (၂) ရက်မှာ အဆုံးသတ်တယ်၊ လာလီဂါက ဇူလိုင် (၁၉)ရက်၊ ပရီးမီးယားလိဂ်က ဇူလိုင် (၂၆) ရက်မှာ အဆုံးသတ်တယ်။ စီးရီးအေဆိုရင် သြ ဂုတ်လ (၂)ရက်အထိ အဆုံးမသတ်သေးပါဘူး။ ချန်ပီယံလိဂ် ကွာတားဖိုင်နယ်မတိုင်ခင်မှာ ပြင်သစ်နဲ့ ဂျာမန်ကလပ်အသင်းတွေက အနားယူချိန်ပိုရခဲ့တယ်။ အတ္တလန်တာနဲ့ မန်စီးတီးက (၄ .၂၈)ရက်နှုန်းမှာ တစ်ပွဲကစားရပြီး အက်သလက်တီကိုနဲ့ ဘာစီလိုနာက (၅)ရက် ကို တစ်ပွဲနှုန်း ကစားခဲ့ရပါတယ်။ ဒီအချိန်မှာ ပြင်သစ်နဲ့ ဂျာမန်ကလပ်အသင်းတွေက နားရက်တွေပိုရခဲ့ပြီး ပြင်ဆင်ချိန်ပိုများခဲ့ပါတယ်။ ဒါက ကောက်ချက်တစ်ခုမဟုတ်ပေမယ့် နားရက်ပိုရခဲ့တာဟာ အားသာချက်ဖြစ်ခဲ့ပါတယ်”ဟု ပြောကြားခဲ့သည်။
၁၉၉၁ ခုနှစ်နောက်ပိုင်း ပထမဆုံးအကြိမ်အဖြစ် လာလီဂါ၊ စီးရီးအေနှင့် ပရီးမီးယားလိဂ်အသင်းများ ချန်ပီယံလိ်ဂ်ဆီမီးဖိုင်နယ်သို့ တစ်သင်းမှ မတက်ရောက်နိုင်သည့်ရာသီအဖြစ် လက်ရှိရာသီက မှတ်တမ်းဝင်ခဲ့သည်။
