ချယ်လ်ဆီးအသင်းနှင့် အင်္ဂလန်အသင်း၏ ကွင်းလယ်ကစားသမားဟောင်း ဂျိုးကိုးလ်က ယခုရာသီ ချန်ပီယံလိဂ်ပြိုင်ပွဲ၏ ဆီမီးဖိုင်နယ်အဆင့်သို့ ပရီးမီးယားလိဂ်ကလပ်(၄)သင်း တက်ရောက်နိုင်မည်ဖြစ်ပြီး လက်ရှိချန်ပီယံ ချယ်လ်ဆီးအသင်း ချန်ပီယံဆုကို ကာကွယ်နိုင်လိမ့်မည်ဟု ခန့်မှန်းပြောကြားခဲ့သည်။
ဂျိုးကိုးလ်က ပရီးမီးယားလိဂ်သည် အခြားပြိုင်ဘက်လိဂ်များထက် ပိုမိုအင်အား တောင့်တင်းနေသည်ဟု ထင်မြင်ကြောင်းလည်း ဆိုခဲ့သည်။
ဂျိုးကိုးလ်က ”ချန်ပီယံလိဂ် ဆီမီးဖိုင်နယ်အဆင့်ကို ကျွန်တော်တို့ ပရီးမီးယားလိဂ်က အနည်းဆုံး(၂)သင်း မတက်ရောက်နိုင်ခဲ့ဘူးဆိုရင် ကျွန်တော် သတိလစ်သွားနိုင်ပါတယ်။ (၃)သင်း တက်ရောက်နိုင်ခြေရှိပြီး (၄)သင်းစလုံးလည်း ဖြစ်နိုင်ပါတယ်။ ကျွန် တော်တို့က တခြားလိဂ်တွေထက် အများကြီး အင်အားကြီးထွားနေပြီလို့လည်း ထင်ပါတယ်။ အင်္ဂလိပ်ဘောလုံးက လက်ရှိအချိန်မှာ အကောင်းဆုံးဖြစ်နေပါပြီ။ မန်စီးတီး၊ လီဗာပူးလ်၊ ချယ်လ်ဆီးနဲ့ မန်ယူအသင်းတွေမှာ အင်္ဂလန်ကစားသမားတွေအပြည့်ပါ။ ဒါကြောင့် ပရီးမီးယားလိဂ်အသင်းတွေကို မယုံနိုင်စရာအကြောင်း မရှိပါဘူး”ဟု ပြောကြားခဲ့သည်။
ထို့ပြင် ဗိုလ်စွဲမည့်အသင်းကို ခန့်မှန်းရန်မှာမူ ခက်ခဲကြောင်း၊ ပရီးမီးယားလိဂ်ထိပ်သီး(၄)သင်းမှာ တစ်သင်းကို တစ်သင်း အနိုင်ယူနိုင်စွမ်းရှိကြောင်း၊ အလားအလာအကောင်းဆုံးအဖြစ် ချယ်လ်ဆီးကို ရွေးချယ်လိုပြီး အသင်းဟောင်းဖြစ်နေသောကြောင့် ရွေးချယ်ခြင်းမဟုတ်ဘဲ ပြီးခဲ့သည့်ရာသီထက် ပိုမိုတောင့်တင်းသည့်အသင်း ဖြစ်လာခြင်းကြောင့်ဖြစ်ကြောင်းလည်း ပြောကြားခဲ့သည်။
