အင်္ဂလန်ဘောလုံးအဖွဲ့ချုပ်(FA)သည် ကွန်မြူနတီဒိုင်းလုပွဲတွင် ပရိသတ်များကို ကွင်းအတွင်း ဝင်ရောက်ကြည့်ရှုခွင့်ပေးသွားဖွယ်ရှိကြောင်း သိရှိရသည်။
၂၀၂၀-၂၁ ရာသီ ပရီးမီးယားလိဂ်ပြိုင်ပွဲအကြိုအဖြစ်ကျင်းပမည့် ကွန်မြူနတီဒိုင်းလုပွဲကို FA က သြဂုတ်လ (၃၀)ရက်တွင် ကျင်းပရန် စီစဉ်နေပြီး ပရီးမီးယားလိဂ်ချန်ပီယံ လီဗာပူးလ်နှင့် FA ဖလားချန်ပီယံ (အာဆင်နယ်-ချယ်လ်ဆီး)တို့ ကစားရမည်ဖြစ်သည်။
![](https://sportsmyan.com/wp-content/uploads/2020/07/Fans-1024x536.jpg)
ပရီးမီးယားလိဂ်ပြိုင်ပွဲတွင် ကွင်းအတွင်း ပရိသတ်များ ဝင်ရောက်ကြည့်ရှုခွင့်ရခဲ့သည့်နောက်ဆုံးပွဲမှာ မတ်လ (၉)ရက်က ကစားခဲ့သည့် လက်စတာ (၄-၀) အက်စတွန်ဗီလာ ဖြစ်သည်။ ယင်းနောက်ပိုင်းတွင် ကိုရိုနာဗိုင်းရပ်စ်ကပ်ဘေးကြောင့် ပရီးမီးယားလိဂ်ပွဲစဉ်များကို ကွင်းပိတ်ကစားခဲ့ရသည်။
FA တာဝန်ရှိသူများသည် လာမည့်ရာသီတွင် ကွင်းအတွင်း ပရိသတ်များဝင်ရောက် ကြည့်ရှုခွင့်ပေးရန် စီစဉ်နေပြီး ကွန်မြူနတီဒိုင်းလုပွဲတွင် စတင်ရန် ရည်မှန်းနေခြင်းလည်းဖြစ်သည်။