ကစားသမားအပြောင်းအရွှေ့ကိစ္စနှင့်ပတ်သက်ပြီး ချယ်လ်ဆီးအသင်းပိုင်ရှင်သစ်က အသင်းနည်းပြ တူဟယ်လ်ကို အပြည့်အဝထိန်းချုပ်ခွင့်ပေး

ချယ်လ်ဆီးအသင်းပိုင်ရှင် တော့ဒ်ဘိုလေသည် ယခုနွေရာသီအပြောင်းအရွှေ့စျေးကွက်မှစတင်ပြီး ကစားသမားအပြောင်းအရွှေ့ကိစ္စရပ်များနှင့်ပတ်သက်ပြီး အသင်းနည်းပြ တူဟယ်လ်ကို အပြည့်အဝထိန်းချုပ်ခွင့်ပေးခဲ့ကြောင်း ဗြိတိန်သတင်းစာ Telegraph က ဖော်ပြခဲ့သည်။

ချယ်လ်ဆီးအသင်းသည် ယခင်က ကစားသမားသစ်များခေါ်ယူရာတွင် အသင်းနည်းပြနှင့် ၎င်းထက် ရာထူးပိုကြီးသူများ တိုင်ပင်ဆွေးနွေးပြီး အားလုံးသဘောတူမှသာ ပြုလုပ်လေ့ရှိကြောင်း သိရသည်။

ထို့ပြင် ကစားသမားများရောင်းထုတ်ရာတွင် နည်းပြထက် ကလပ်အသင်းတာဝန်ရှိသူများက စိတ်ကြိုက်လုပ်ဆောင်လေ့ရှိကြောင်း သိရသည်။

သို့သော် ယခုနွေရာသီမှစတင်ကာ ချယ်လ်ဆီးနည်းပြ တူဟယ်လ်အနေဖြင့် ကစားသမားအဝင်အထွက်ကိစ္စရပ်များကို သူ့စိတ်ကြိုက် အပြည့်အဝထိန်းချုပ်ခွင့်ရတော့မည်ဖြစ်ကြောင်း Telegraph က ဖော်ပြခဲ့သည်။

ချယ်လ်ဆီးအသင်းကို ပေါင် (၄.၂၅)ဘီလီယံဖြင့် ဝယ်ယူခဲ့သည့် တော့ဒ်ဘိုလေသည် တူဟယ်လ်ကို ယုံကြည်နေပြီး မန်စီးတီးနည်းပြ ဂွါဒီယိုလာနှင့် လီဗာပူးလ်နည်းပြ ကလော့ပ်တို့ကဲ့သို့ လုပ်ပိုင်ခွင့်ပေးခဲ့ခြင်းဖြစ်ကြောင်း သိရသည်။

မန်စီးတီးနှင့် လီဗာပူးလ်အသင်းတို့တွင် ဂွါဒီယိုလာနှင့် ကလော့ပ်တို့သည် ကစားသမားအပြောင်းအရွှေ့ကိစ္စနှင့်ပတ်သက်ပြီး အပြည့်အဝထိန်းချုပ်ခွင့်ရထားကြပြီး ဆုဖလားများလည်း ရယူနိုင်ခဲ့ကြသည်။

Telegraph ၏ဖော်ပြမှုအရ တူဟယ်လ်အနေဖြင့် ကစားသမားအပြောင်းအရွှေ့ကိစ္စရပ်များကို ဆောင်ရွက်ရာတွင် အားကစားဒါရိုက်တာ ဂရန်နော့ဗ်စကာယီယာ၊ နည်းစနစ်နှင့် စွမ်းဆောင်မှုပိုင်းအကြံပေး ပီတာချက်တို့နှင့် ပူးပေါင်းဆောင်ရွက်မည်ဖြစ်ပြီး အဓိကဆုံးဖြတ်ချက်ကို ချမှတ်သွားဖြစ်ကြောင်း သိရသည်။

ချယ်လ်ဆီးအသင်းသည် ယခုနွေတွင် ပေါင်သန်း (၂၀၀)အထိ အသုံးပြုသွားဖွယ်ရှိနေကြောင်းလည်း သိရှိရသည်။