အမေရိကန်အခြေစိုက် Wealthy Gorilla ဝက်ဘ်ဆိုက်မှထုတ်ပြန်ခဲ့သည့် ကမ္ဘာ့အချမ်းသာဆုံးဘောလုံးသမား (၂၀)ဦးစာရင်းတွင် မန်ယူဝါရင့်တိုက်စစ်မှူး စီရော်နယ်လ်ဒိုနှင့် အင်္ဂလန်ဂန္ထဝင်ကွင်းလယ်လူ ဒေးဗစ်ဘက်ခမ်တို့ ထိပ်ဆုံး၌ ပူးတွဲရပ်တည်ခဲ့ကြောင်း သိရှိရသည်။
Wealthy Gorilla ဝက်ဘ်ဆိုက်သည် သမိုင်းတစ်လျှောက် ကမ္ဘာ့အချမ်းသာဆုံးဘောလုံးသမားများကို ထုတ်ပြန်ရာတွင် ၎င်းတို့၏ ပိုင်ဆိုင်မှု၊ Forbes မဂ္ဂဇင်းမှ အချက်အလက်များကို အခြေခံကာ တွက်ချက်ခဲ့ခြင်းဖြစ်ကြောင်း သိရသည်။
၎င်း၏ထုတ်ပြန်ချက်အရ ကမ္ဘာ့အချမ်းသာဆုံးဘောလုံးသမားအဖြစ် မန်ယူနှင့် အင်္ဂလန်ဂန္ထဝင်ကစားသမား ဒေးဗစ်ဘက်ခမ်သည် လက်ရှိ မန်ယူဝါရင့်တိုက်စစ်မှူး စီရော်နယ်လ်ဒိုနှင့်အတူ ဒေါ်လာသန်း (၄၅၀)ဖြင့် နံပါတ် (၁)နေရာတွင် ပူးတွဲရပ်တည်ခဲ့ကြောင်း သိရှိရသည်။
အသက် (၄၆)နှစ်အရွယ်ရှိ ဒေးဗစ်ဘက်ခမ်သည် လက်ရှိတွင် အင်တာမိုင်ယာမီအသင်းနှင့် ဆဲလ်ဖို့ဒ်အသင်းတို့၏ ပူးတွဲပိုင်ရှင်ဖြစ်သလို၊ အင်တာမိုင်ယာမီအသင်းတွင် အသင်းဥက္ကဋ္ဌအဖြစ်လည်း ဆောင်ရွက်နေသူဖြစ်သည်။
ထို့ပြင် ဘက်ခမ်သည် Adidas၊ Pepsi၊ Giorgio Armani၊ Gillette တို့ထံမှ စပွန်ဆာများရရှိနေပြီး၂၀၂၂ ကမ္ဘာ့ဖလားအိမ်ရှင် ကာတာနိုင်ငံ၏ သံတမန်အဖြစ် ဆောင်ရွက်ခဲ့ခြင်းကြောင့် ဒေါ်လာသန်း (၁၅၀) ရရှိခဲ့ကြောင်း သိရသည်။
စီရော်နယ်လ်ဒိုသည် မန်ယူအသင်းတွင် တစ်ပတ်လစာ ပေါင် (၄၈၅၀၀၀)အထိရရှိနေပြီး ပရီးမီးယားလိဂ်တွင် လစာအများဆုံးရ ကစားသမားအဖြစ် ရပ်တည်နေသလို၊ စပွန်ဆာများနှင့် ကိုယ်ပိုင်လုပ်ငန်းများမှ ဝင်ငွေများစွာ ရရှိနေခြင်းကြောင့် ဘက်ခမ်နှင့်အတူ ထိပ်ဆုံးတွင် ရပ်တည်ခဲ့ခြင်းဖြစ်သည်။
PSG တိုက်စစ်မှူး မက်ဆီမှာမူ ဒေါ်လာသန်း (၄၀၀) ဖြင့် အဆင့် (၃)နေရာတွင် ရပ်တည်နေသည်။
ကမ္ဘာ့အချမ်းသာဆုံး ဘောလုံးသမား (၂၀)ဦးစာရင်းတွင် လက်ရှိဘောလုံးကစားနေသူ (၉)ဦးသာပါဝင်ပြီး ဘောလုံးသမားဘဝမှ အနားယူသူ (၁၁)ဦးအထိ ပါဝင်နေသည်။
