ဥရောပဘောလုံးအဖွဲ့ချုပ် (UEFA)၏ ၂၀၂၀-၂၁ ရာသီအတွက် အကောင်းဆုံးသွင်းဂိုးဆုကို ပေါ်တိုတိုက်စစ်မှူး မက်ဒီတာရေမီက ချယ်လ်ဆီးအသင်းနှင့် ယှဉ်ပြိုင်ကစားခဲ့သော ချန်ပီယံလိဂ်ကွာတားဖိုင်နယ်ဒုတိယအကျော့မှသွင်းဂိုးဖြင့် ရရှိခဲ့ကြောင်း သိရသည်။
အီရန်လက်ရွေးစင်တိုက်စစ်မှူး တာရေမီ(၂၉ နှစ်)သည် ယင်းဂိုးကို Bicycle Kick ဖြင့် သွင်းယူခဲ့ခြင်းဖြစ်သည်။
အကောင်းဆုံးသွင်းဂိုးဆုကို ပရိသတ်များ၏ဆန္ဒမဲဖြင့် ရွေးချယ်ခြင်းဖြစ်ပြီး ပရိသတ်(၆)သိန်းကျော် မဲပေးခဲ့ရာတွင် တာရေမီက (၃၀%)နီးပါး ရရှိခဲ့ခြင်းဖြစ်ကြောင်း UEFA က ဖော်ပြခဲ့သည်။
ဒုတိယနေရာတွင် ယူရို-၂၀၂၀ ပြိုင်ပွဲ ကွာတားဖိုင်နယ်၌ ဘယ်လ်ဂျီယံအသင်းဘက်သို့ သွင်းယူခဲ့သည့် အင်ဆစ်ဂ်ညာ၏ သွင်းဂိုးက ရပ်တည်ခဲ့သည်
တတိယနေရာတွင် ယူရိုပါလိဂ်အုပ်စုအဆင့်၌ စတန်းဒတ်လိဂ်အသင်းဘက်သို့ ရိန်းဂျားစ်ကွင်းလယ်လူ ကီမာရုဖ် သွင်းယူခဲ့သောဂိုးက ရပ်တည်ခဲ့ကြောင်း သိရသည်။
UEFA သည် ယခုဆုရွေးချယ်ရန် ၂၀၂၀ အောက်တိုဘာမှ ၂၀၂၁ ဇူလိုင်လအတွင်း ယှဉ်ပြိုင်ကစားခဲ့သည့်ပွဲများထဲမှ အကောင်းဆုံးသွင်းဂိုး(၁၀)ဂိုးကို ဆန်ခါတင်ရွေးထုတ်ကာ ပရိသတ်များကို ဆန္ဒမဲပေးစေခဲ့ခြင်းဖြစ်သည်။
ယင်းစာရင်းတွင် ယူရို -၂၀၂ဝပြိုင်ပွဲမှ သွင်းဂိုး(၃)ဂိုးပါဝင်ခဲ့သော်လည်း အကောင်းဆုံးသွင်းဂိုးဆုနှင့် လွဲချော်ခဲ့ရသည်။
ပြီးခဲ့သည့်နှစ်က အကောင်းဆုံးသွင်းဂိုးဆု ရွေးချယ်ခြင်းမပြုခဲ့ကြောင်း သိရသည်။
