အင်္ဂလန်နိုင်ငံအခြေစိုက် Three ဆက်သွယ်ရေးကုမ္ပဏီက ချယ်လ်ဆီးအသင်းနှင့် စပွန်ဆာစာချုပ်ကို ပြန်လည်စတင်လိုက်ပြီ ဖြစ်ကြောင်း သိရသည်။
ရုရှားက ယူကရိန်းအပေါ် ကျူးကျော်စစ်ပွဲ စတင်ဆင်နွှဲပြီးနောက် ဗြိတန်အစိုးရက ချယ်လ်ဆီးအသင်းပိုင်ရှင် ရုရှားဘီလျံနာ အေဘရာမိုဗစ်ချ်၏ ပိုင်ဆိုင်မှုများ၊ စီးပွားရေးလုပ်ငန်းများကို ရပ်ဆိုင်းထားရန် ကြေညာခဲ့သည်။
ထို့ကြောင့် အင်္ဂလန်နိုင်ငံ ရက်ဒင်းမြို့ အခြေစိုက် Three ဆက်သွယ်ရေးနှင့် အင်တာနက်ဝန်ဆောင်မှုကုမ္ပဏီက ချယ်လ်ဆီးအသင်းနှင့် ချုပ်ဆိုထားသည့် ရင်ဘတ်စပွန်ဆာကို ရပ်ဆိုင်းထားရန် မတ်လအတွင်း ကြေညာခဲ့သည်။
Three ကုမ္ပဏီက ၎င်းတို့၏ အမှတ်တံဆိပ်ကို ချယ်လ်ဆီးအသင်းအကျႌနှင့် စတမ်းဖို့ဒ်ဘရစ်ချ်ကွင်းအတွင်း ဖယ်ရှားပေးရန် တောင်းဆိုခဲ့သော်လည်း ချယ်လ်ဆီးအသင်းကမူ ရာသီကုန်ချိန်အထိ ယင်းအမှတ်တံဆိပ်ပါဝင်သည့် ဂျာစီအကျႌကို ဝတ်ဆင်ကစားခဲ့သည်။
ယခုအခါ ချယ်လ်ဆီးအသင်းကို အမေရိကန်ဘီလျံနာ တော့ဒ်ဘိုလီဦးဆောင်သည့် လုပ်ငန်းစုက ဝယ်ယူလိုက်ပြီ ဖြစ်သောကြောင့် Three ကုမ္ပဏီက စပွန်ဆာစာချုပ်ကို ပြန်လည်စတင်ရန် ဆုံးဖြတ်ခဲ့ခြင်း ဖြစ်သည်။
Three ဆက်သွယ်ရေးနှင့် အင်တာနက်ဝန်ဆောင်မှုကုမ္ပဏီသည် ချယ်လ်ဆီးအသင်းနှင့် ၂၀၂၀-၂၀၂၁ ရာသီတွင် စတင်လက်တွဲခဲ့ပြီး သုံးနှစ်စာချုပ် ချုပ်ဆိုထားကာ တစ်နှစ်ထပ်မံသက်တမ်းတိုးနိုင်သည့် အချက်လည်း ပါဝင်ကြောင်း သိရသည်။
