ပြင်သစ်လီဂူးကလပ် Reims အသင်းတွင် အငှားလာရောက်ကစားနေသည့် အာဆင်နယ်အသင်း၏ အင်္ဂလန်ယူ-၂၁ တိုက်စစ်မှူးဘာလိုဂန်သည် လီဂူး-၁ ပြိုင်ပွဲသမိုင်း၏ စံချိန်မှတ်တမ်းတစ်ခုကို ပိုင်ဆိုင်ခဲ့ကြောင်းသိရသည်။
ဘာလိုဂန်သည် မတ်လ (၁၂)ရက်နေ့က ယှဉ်ပြိုင်ခဲ့သည့် မိုနာကိုအသင်းနှင့် ပြင်သစ်လီဂူးပွဲစဉ်တွင် Reims အသင်းအတွက် တစ်လုံးတည်းသောအဖိုးတန်အနိုင်ဂိုးအား သွင်းယူခဲ့ပြီးနောက် ၎င်း၏ ယခုရာသီ ပြင်သစ်လီဂူးသွင်းဂိုးအရေအတွက်မှာ (၁၆)ဂိုးအထိရှိလာခဲ့သည်။
ထို့ကြောင့် ဘာလိုဂန်သည် အသက် (၂၁)နှစ်၊ (၂၅၂)ရက်ဖြင့် ၁၉၆၀-၆၁ ရာသီနောက်ပိုင်း နှစ်ပေါင်း (၆၂)နှစ်အတွင်း ပြင်သစ်လီဂူးပြိုင်ပွဲသမိုင်းတွင် ပထမဆုံးကစားသည့်ရာသီ၌ သွင်းဂိုး (၁၆) ဂိုးသွင်းယူနိုင်သည့် အသက်အငယ်ဆုံးကစားသမားအဖြစ် မှတ်တမ်းဝင်နိုင်ခဲ့သည်။
အမေရိကန်နိုင်ငံဖွား အာဆင်နယ်အသင်းအကယ်ဒမီထွက်တိုက်စစ်မှူး ဘာလိုဂန်သည် ပြီးခဲ့သည့် ၂၀၂၂ နွေရာသီအပြောင်းအရွှေ့က Reims အသင်းသို့ အငှားဖြင့်ပြောင်းရွှေ့လာခဲ့သူဖြစ်ပြီး အသင်းအတွက် ပထမဆုံးရာသီတွင် ပြိုင်ပွဲစုံ (၂၈)ပွဲကစားရာ၌ (၁၇)ဂိုးသွင်းယူပေးထားနိုင်ခဲ့သည်။
