PSG အသင်းထံသို့ စီရော်နယ်လ်ဒို ပြောင်းရွှေ့ရန်စီစဉ်နေပြီး လီယိုနာဒိုနှင့် ဂျော့ချ်မန်ဒက်စ်တို့ ဆွေးနွေးကြလိမ့်မည်ဟု ပြင်သစ်မီဒီယာများ ဖော်ပြ

ဂျူဗင်တပ်စ်အသင်း၏ ပေါ်တူဂီတိုက်စစ်မှူး စီရော်နယ်လ်ဒိုသည် ပြင်သစ်ထိပ်သီးကလပ် PSG အသင်းထံသို့ ပြောင်းရွှေ့ရန် စီစဉ်နေပြီး သူ၏ အေးဂျင့်ဖြစ်သူ ဂျော့ချ်မန်ဒက်စ်နှင့် PSG အသင်း၏ ဒါရိုက်တာဖြစ်သူ လီယိုနာဒိုတို့သည် ယင်းကိစ္စအတွက် ဆွေးနွေးကြလိမ့်မည်ဖြစ်ကြောင်း ပြင်သစ်မီဒီယာများက ဖော်ပြနေသည်။

စီရော်နယ်လ်ဒိုသည် ချန်ပီယံလိဂ်ပြိုင်ပွဲတွင် ဂျူဗင်တပ်စ်အသင်း၏ ရလဒ်များကို စိတ်ပျက်နေပြီး ချန်ပီယံလိဂ်ဖလားကို အရယူရန်အတွက် အခြားအသင်းတစ်သင်းနှင့်အတူ ကြိုးပမ်းရန် အသင့်ရှိနေသည်ဟုလည်း မီဒီယာများက ဆိုသည်။

သူသည် မကြာမီ ပေါ်တူဂီသို့ပြန်တော့မည်ဖြစ်ပြီး သူ၏ အေးဂျင့်ဖြစ်သူ ဂျော့ချ်မန်ဒက်စ်သည် ပေါ်တူဂီမြေတွင် ချန်ပီယံလိဂ်ပွဲလာကစားမည့် PSG အသင်းဒါရိုက်တာ လီယိုနာဒိုနှင့်တွေ့ဆုံရန် စီစဉ်ထားပြီးဖြစ်သည်ဟုလည်း သိရှိရသည်။

အသက် (၃၅)နှစ်အရွယ်ရှိပြီဖြစ်သည့် စီရော်နယ်လ်ဒိုသည် ပြီးခဲ့သည့်ရာသီက စီးရီးအေတွင် (၃၁)ဂိုး သွင်းယူနိုင်ခဲ့သော်လည်း ဂိုးသွင်းဘုရင် မဖြစ်ခဲ့သလို၊ ချန်ပီယံလိဂ်တွင်လည်း ဂျူဗင်တပ်စ်အသင်းအတွက် ဂိုးအများဆုံးသွင်းယူသူအဖြစ် ရပ်တည်နိုင်ခဲ့သည်။

စီရော်နယ်လ်ဒိုသည် PSG အသင်းနှင့် ဂျော့ချ်မန်ဒက်စ်တို့၏ ဆွေးနွေးမှု အဆင်မပြေလျှင်မူ ဂျူဗင်တပ်စ်အသင်းတွင် ဆက်ကစားသွားမည်ဖြစ်ပြီး နည်းပြအပြောင်းအလဲကြောင့် ဂျူဗင်တပ်စ်တွင်ဆက်နေရန် စဉ်းစားခြင်းဖြစ်သည်ဟုလည်း သိရှိရသည်။

ဂျူဗင်တပ်စ်အသင်းကမူ ဘဏ္ဍာရေး အကျပ်အတည်း ရှိနေသည့်အတွက် တစ်နှစ်လစာ ယူရိုသန်း (၃၀)ကျော် ပေးနေရသည့် စီရော်နယ်လ်ဒိုထွက်မည်ဆိုပါက ရောင်းထုတ်ရန် စဉ်းစားဖွယ်ရှိနေကြောင်းသိရသည်။