PSG အသင်းနည်းပြဖြစ်လာရန် နီးစပ်နေသည့် ဂျာမန်လူငယ်နည်းပြ နာဂယ်စ်မန်းသည် ပြင်သစ်ဂန္ထဝင်တိုက်စစ်မှူး အွန်နရီကို လက်ထောက်နည်းပြအဖြစ် ခန့်အပ်ဖွယ်ရှိနေကြောင်း သိရသည်။
နာဂယ်စ်မန်းသည် ပရီးမီးယားလိဂ်ထိပ်သီးကလပ်အသင်းများဖြစ်သည့် ချယ်လ်ဆီး၊ စပါးတို့မှ နည်းပြအဖြစ် ကမ်းလှမ်းမှုကို ငြင်းဆန်ခဲ့ပြီး လက်ရှိ PSG နည်းပြ ဂယ်လ်ချီ၏ နေရာတွင် အစားထိုးတာဝန်ယူရန် ဆွေးနွေးမှုများ ပြုလုပ်လျက်ရှိသည်။ ဗြိတိန်သတင်းစာ Telegraph က နာဂယ်စ်မန်းသည် PSG နည်းပြအဖြစ် ခန့်အပ်တာဝန်ပေးခံရလျှင် ၎င်းနှင့် လက်တွဲမလုပ်ဖူးသည့် ပြင်သစ်နိုင်ငံသား အွန်နရီကို ခေါ်ယူရန် ဆန္ဒရှိနေကြောင်းတင်ပြခဲ့သည်။
အွန်နရီသည် ၂၀၂၂ ကာတာကမ္ဘာ့ဖလားပြိုင်ပွဲတွင် ဘယ်လ်ဂျီယံအသင်း လက်ထောက်နည်းပြအဖြစ် ဆောင်ရွက်ခဲ့ပြီး PSG တိုက်စစ်မှူး ဘာပေနှင့်လည်း အလွန်ရင်းနှီးသည့် ဆက်ဆံရေးရှိနေကြောင်း သိရသည်။ အသက် ၄၅ နှစ်အရွယ်ရှိ အွန်နရီအနေဖြင့် ၂၀၁၈ အောက်တိုဘာလက လီဂူးကလပ် မိုနာကိုအသင်းနည်းပြအဖြစ် သုံးနှစ်စာချုပ် ချုပ်ဆိုကာ ဆောင်ရွက်ခဲ့ဖူးပြီး သုံးလကျော်အကြာတွင် ရလဒ်ဆိုးများကြောင့် ရာထူးမှထုတ်ပယ်ခံခဲ့ရသည်။
မိုနာကိုအသင်းသည် အွန်နရီလက်ထက် ပွဲ ၂၀ တွင် လေးပွဲနိုင်၊ ငါးပွဲသ ရေ၊ ၁၁ ပွဲရှုံးဖြင့် အသင်းမှာလည်း အမှတ်ပေးဇယား အဆင့် ၁၉ နေရာသို့ ကျဆင်းသွားခဲ့ရသည်။ ယင်းနောက်တွင် မေဂျာလိဂ်ကလပ် မွန်ထရီယဲလ်အင်ပတ်စ်အသင်း၌ နည်းပြအဖြစ် တစ်နှစ်ကျော်ကြာ ဆောင်ရွက်ခဲ့ပြီး ၂၀၂၁ မေလတွင် ဘယ်လ်ဂျီယံအသင်းသို့ မာတီနက်ဇ်၏လက်ထောက်အဖြစ် ရောက်ရှိခဲ့သည်။
