PSG အသင်းနည်းပြဖြစ်သူ ပိုချက်တီနိုက မိမိအနေဖြင့် အသင်းတွင် ရာနှုန်းပြည့် ဆက်ရှိနေလိုသည်ဟု ပြောကြားခဲ့သည်။
၎င်းအနေဖြင့် စာချုပ်သက်တမ်းပြည့်မည့် ၂၀၂၃ အထိ အသင်းကို ဆက်လက်ကိုင်တွယ်ရန် ဆန္ဒရှိနေခြင်းဖြစ်သည်။
အသက်(၅၀) အရွယ်ရှိ အာဂျင်တီးနားလူမျိုး နည်းပြ ပိုချက်တီနိုသည် PSG အသင်းနှင့် ၂၀၂၃ ဇွန်(၃၀)ရက်အထိ စာချုပ်သက်တမ်းရှိနေသော်လည်း ၂၀၂၁-၂၂ ရာသီ ချန်ပီယံလိဂ်ရှုံးထွက်(၁၆) သင်းအဆင့်မှ ထွက်ခွာခဲ့ရပြီးနောက် အသင်းနှင့်လမ်းခွဲရ ဖွယ်ရှိသည်ဟု သတင်းထွက်ပေါ်နေသူဖြစ်သည်။
သို့ သော် ပိုချက်တီနိုက မိမိအနေဖြင့် PSG အသင်းတွင် ဆက်ရှိနေလိုပြီး အသင်းတွင်ရှိနေသည့် စိန်ခေါ်မှုများက မည်သည့်နည်းပြကိုမဆို စိတ်အားထက်သန်စေကြောင်း ပြောကြားခဲ့ခြင်းဖြစ်သည်။
ပိုချက်တီနိုက ”PSG အသင်းမှာ ကျွန်တော် (၁၀၀) ရာခိုင်နှုန်း ဆက်ရှိနေချင်ပါတယ်။ ဒါကို အရင်ကလည်း ကျွန်တော် ပြောဖူးပါတယ်။ PSG နဲ့ ချုပ်ဆိုထားတဲ့ ကျွန်တော့်ရဲ့ စာချုပ်ကလည်း တစ်နှစ်သက်တမ်း ကျန်ရှိနေသေးတာပါ။ ဒီအသင်းမှာ စိန်ခေါ်မှုတွေ ရှိနေပြီး အဲဒီစိန်ခေါ်မှုတွေက နည်းပြတိုင်းကို စိတ်အားထက်သန်စေပါတယ်။ PSG အသင်းက ရည်မှန်းချက်ကြီးမားတဲ့အသင်းဖြစ်ပြီး ကျွန်တော့်အနေနဲ့ အသင်းမှာ ဆက်နေချင်ပါတယ်။ ချန်ပီယံလိဂ်ရှုံးထွက်(၁၆) သင်းအဆင့်ကနေ ထွက်ခွာခဲ့ရတဲ့အတွက် အရမ်းစိတ်ပျက်ရပါတယ်။ ဘာကြောင့်လဲဆိုတော့ ချန်ပီယံလိဂ်ရဖို့က အသင်းပရိသတ်တွေရဲ့ မျှော်လင့်ချက် ဖြစ်နေလို့ပါ”ဟု ပြောကြားခဲ့သည်။
ပိုချက်တီနိုသည် PSG အသင်း ကို ၂၀၂၁ ဇန်နဝါရီတွင် စတင်ကိုင်တွယ်ခဲ့ပြီး ပြည်တွင်းဖလား (၃)လုံး ရယူပေးထားသည်။
