PSG အသင်းတွင် အနာဂတ်လှုပ်ခတ်နေသည့် တိုက်စစ်ကစားသမား နေမာသည် အသင်းတွင် ဆက်ရှိနေမည်ဟု ယုံကြည်ကြောင်းနှင့် သူ၏အစီအစဉ်ထဲတွင် ပါဝင်ကြောင်း နည်းပြသစ် ဂယ်လ်ချီက ပြောကြားခဲ့သည်။
အသက် ၅၅ နှစ်အရွယ်ရှိပြီဖြစ်သူ ဂယ်လ်ချီသည် PSG အသင်းနှင့် နှစ်နှစ်သက်တမ်းရှိစာချုပ် ချုပ်ဆိုခဲ့ပြီး ၂၀၁၁ ခုနှစ်တွင် ကာတာပိုင်ဆိုင်မှုအောက်ရောက်ရှိပြီးနောက် အသင်း၏ခုနစ်ဦးမြောက်နည်းပြအဖြစ် မှတ်တမ်းဝင်ခဲ့သည်။
နေမာ၏အနာဂတ်နှင့်ပတ်သက်ပြီး ဂယ်လ်ချီက “သူ(နေမာ)က ကမ္ဘာ့အဆင့်ကစားသမားတစ်ယောက်ပါ။ သူလို ကစားသမားမျိုးကို အသင်းမှာ မလိုချင်တဲ့ နည်းပြ ရှိနိုင်ပါ့မလား။ တကယ်တော့ နှစ်ဖက်ညီမျှမှုတော့ ရှိရပါမယ်။ သူ့ဆီက ဘာလိုချင်သလဲတော့ ကျွန်တော် ရှင်းရှင်းလင်းလင်း သိပါတယ်။ သူ ကျွန်တော်တို့နဲ့ ဆက်ရှိနေပါလိမ့်မယ်။ ဘာကြောင့်လဲဆိုတော့ ကျွန်တော်တို့က အသင်းမှာ အကောင်းဆုံးကစားသမားတွေကိုပဲ လိုချင်ပါတယ်” ဟု ပြောကြားခဲ့သည်။
ဂယ်လ်ချီသည် ၂၀၂၁ ခုနှစ်က လိုင်လီအသင်းကို အမှတ်ပေးချန်ပီယံဆုရယူပေးခဲ့ပြီး ပြီးခဲ့သည့်ရာသီကလည်း နိုက်စ်အသင်းကို အမှတ်ပေးပြိုင်ပွဲ၌ အဆင့် ၅ နှင့် ပြင်သစ်ဖလား ဒုတိယနေရာရရှိအောင် စွမ်းဆောင်ပေးခဲ့သည်။
ဂယ်လ်ချီသည် ပြီးခဲ့သည့်ဆယ်စုနှစ်တစ်ခုအတွင်း PSG အသင်းကို အမှတ်ပေးချန်ပီယံမဖြစ်အောင် တားဆီးနိုင်သည့် နည်းပြနှစ်ဦးထဲမှ တစ်ဦးအဖြစ် မှတ်တမ်းဝင်ခဲ့သည်။
