PSG အသင်းတွင် ဆက်လက်ကစားသွားလိုကြောင်း ဘရာဇီးလ် တိုက်စစ်ကစားသမား နေမာက အတည်ပြုပြောကြားခဲ့ပြီး ကလပ်အသင်း၏အစီအစဉ်များကို မိမိအနေဖြင့် မသိရှိထားကြောင်းလည်း ဝန်ခံသွားခဲ့သည်။
အသက်(၃၀)နှစ်အရွယ်ရှိပြီဖြစ်သူ နေမာသည် အူရာဝရတ်စ်အသင်းအား (၃-ဝ)ဂိုးဖြင့် အနိုင်ရသည့်ပွဲတွင် ဒုတိယပိုင်း၌ လူစားဝင်ကစားခဲ့ပြီး ယင်းပွဲပြီးနောက် သူ၏အနာဂတ်အစီအစဉ်များအပေါ် ဖွင့်ဟခဲ့ခြင်းလည်း ဖြစ်သည်။ “ကျွန်တော်ကတော့ အသင်းမှာ ဆက်လက်ကစားသွားချင်နေတုန်းပါပဲ။ လက်ရှိမှာ ကလပ်အသင်းဘက်က ကျွန်တော့်ကို ဘာအကြောင်းအရာမှ ပြောမထားသေးပါဘူး။ ဒါကြောင့် ကျွန်တော်နဲ့ပတ်သက်ပြီး သူတို့ရဲ့အစီအစဉ်တွေ ဘယ်လိုရှိသလဲဆိုတာ ကျွန်တော် မသိပါဘူး”ဟု နေမာက ပြောကြားခဲ့သည်။
နေမာသည် ယခုလအစောပိုင်းက နွေရာသီအပြောင်းအရွှေ့ကာလအတွင်း PSG အသင်းမှ ထွက်ခွာတော့မည်ဟု သတင်းများ ပေါ်ထွက်ခဲ့သူဖြစ်ပြီး ပရီးမီးယားလိဂ်ထိပ်သီးကလပ် ချယ်လ်ဆီးအသင်းကလည်း သူ့အားခေါ်ယူရန် စိတ်ဝင်စားခဲ့ကြသည်။
မကြာသေးမီကမူ PSG အသင်းနည်းပြသစ်ဖြစ်သူ ဂယ်လ်ချီက “နေမာဟာ ရာသီသစ်အတွက် စတင်ကတည်းက အလုပ်ကို ကောင်းကောင်းလုပ်နေပါတယ်။ သူ့ကြည့်ရတာ ပျော်နေတယ်လို့လည်း ကျွန်တော်ခံစားရပြီး ကြံ့ခိုင်မှုလည်း ပြည့်ပါတယ်။ သူ့အခြေအနေကို သတင်းစာရှင်းလင်းပွဲတစ်ခုမှာလည်း ကျွန်တော် ပြောခဲ့ပါတယ်။ အပြောင်းအရွှေ့ပိတ်သိမ်းချိန်မှာ ဘာတွေဖြစ်လာမလဲတော့ ကျွန်တော် မသိပါဘူး။ အခုချိန်မှာ သူနဲ့လည်း ကျွန်တော် သီးခြားပြောဆိုမှု မရှိသေးပါဘူး” ဟု ပြောကြားခဲ့သည်။
