မန်စီးတီးအသင်းနည်းပြ ဂွါဒီယိုလာက မိမိတို့အသင်းအနေဖြင့် PSG အသင်းတိုက်စစ်မှူး နေမာအား ခေါ်ယူရန် ဆွေးနွေးမှုများ ပြုလုပ်နေသည်ဆိုသောသတင်းများမှာ မဟုတ်မှန်ကြောင်း ငြင်းဆန်ပယ်ချခဲ့သည်။
ပြင်သစ်မီီဒီယာများ၏ ဖော်ပြမှုအရ အသင်းသည် ၎င်းတို့၏ တိုက်စစ်မှူး နေမာအား ခေါ်ယူရန် မန်စီးတီးအသင်းထံ ကမ်းလှမ်းခဲ့သလို၊ ဘာနာဒိုဆေးလ်ဗားနှင့် အလဲအထပ်ပြုလုပ်ရန်လည်း ကမ်းလှမ်းခဲ့ပြီး မန်စီးတီးအသင်းသည် နေမာနှင့် အပြောင်းအရွှေ့ကိစ္စအတွက် ဆွေးနွေးနေကြောင်း သိရသည်။
မန်စီးတီးအသင်းသည် ယခုနွေရာသီတွင် တိုက်စစ်ပိုင်းအတွက် ဟော်လန်းနှင့် ယူလီယန်အယ်လ်ဗာရက်ဇ်တို့ကို ခေါ်ယူထားပြီး ဂျေးဇူးနှင့် စတာလင်တို့ထွက်ခွာသွားသော်လည်း နေမာကို မလိုအပ်ကြောင်း ဂွါဒီယိုလာက ပြောကြားခဲ့ခြင်းဖြစ်သည်။
”သတင်းစာတွေက ပုံပြင်တွေ ရေးနေကြတဲ့အတွက် ကျွန်တော်စိတ်မကောင်းပါဘူး။ ဒါပေမဲ့ ဒါတွေက မမှန်ပါဘူး။ သူတို့သတင်းတွေက မှားနေတယ်။ နေမာက အရမ်းကောင်းတဲ့ ကစားသမားဖြစ်ပြီး ပေါင်းသင်းဆက်ဆံရေးအရမ်းကောင်းတဲ့သူလို့ ကျွန်တော် ကြားဖူးပါတယ်။ ဒါပေမဲ့ အခု အချိန်ကတော့ အချိန်မှန်မဟုတ်ပါဘူး”ဟု ဂွါဒီယိုလာက ဆိုခဲ့သည်။
နေမာ (၃၀ နှစ်)သည် PSG အသင်းနှင့် ၂၀၂၇ အထိ သက်တမ်းရှိနေသူဖြစ်ပြီး အသင်းနည်းပြ ဂယ်လ်ချီက ၎င်းကို ဆက်ထိန်းလိုနေသော်လည်း PSG အသင်းက ရောင်းထုတ်လိုနေကြောင်း သိရသည်။
