မက်ဆီ၏အေးဂျင့်အဖြစ် ဆောင်ရွက်နေသည့် ဖခင်ဖြစ်သူ ဟော်ဟဲမက်ဆီက ၎င်း၏သား ဖြစ်သူအနေဖြင့် PSG အသင်းနှင့် စာချုပ်ကုန်ဆုံးမည့် ၂၀၂၃ ခုနှစ်တွင် မေဂျာလိဂ်ကလပ် အင်တာမိုင်ယာမီအသင်းသို့ ပြောင်းရွှေ့ကစားရန် သဘောတူညီမှုရရှိထားသည်ဆိုသော သတင်းများမှာ မဟုတ်မှန်ကြောင်း ငြင်းဆန်ပယ်ချခဲ့သည်။
ပြီးခဲ့သည့် ၂၀၂၁ နွေရာသီတွင် ဘာစီလိုနာအသင်းနှင့်လမ်းခွဲပြီး PSG အသင်းသို့ ပြောင်းရွှေ့ ကြေးအလွတ်ဖြင့် ရောက်ရှိလာသည့် မက်ဆီသည် PSG အသင်းတွင် ထင်မှတ်ထားသလောက် ခြေစွမ်းမပြနိုင်ခဲ့ခြင်းမရှိဘဲ ပြိုင်ပွဲစုံ (၃၃)ပွဲတွင် (၁၁) ဂိုးသာ သွင်းယူနိုင်ခဲ့သည်။
ထို့ပြင် PSG အသင်းသည် ချန်ပီယံလိဂ်ရှုံးထွက် (၁၆)သင်းမှ ထွက်ခွာခဲ့ရသည့်အတွက် မက်ဆီမှာ ဝေဖန်မှုများနှင့် ရင်ဆိုင်ခဲ့ရပြီး ယခုနွေတွင် အသင်းမှထွက်ခွာဖွယ်ရှိသည်ဟု သတင်းများထွက်ပေါ် ခဲ့သည်။
အမေရိကန်သတင်းစာ Front Office Sport ၏ ဖော်ပြချက်အရ မက်ဆီသည် PSG အသင်းနှင့် စာချုပ်သက်တမ်းကုန်ဆုံးမည့် ၂၀၂၃ ခုနှစ်တွင် နာမည်ကျော် အင်္ဂလန်ဘောလုံးသမားဟောင်းပိုင်ဆိုင်သည့် အင်တာမိုင်ယာမီအသင်းသို့ ပြောင်းရွှေ့ ကစားရန် သဘောတူညီမှုရထားကြောင်း ဖော်ပြခဲ့သည်။
ထို့ပြင် မက်ဆီအနေဖြင့် အင်တာမိုင်ယာမီ အသင်း၏ ရှယ်ယာ (၃၅)ရာခိုင်နှုန်းကိုပါ ဝယ်ယူသွားမည်ဖြစ်ကြောင်းလည်း Front Office Sport က ဖော်ပြခဲ့သည်။ သို့သော် မက်ဆီ၏ဖခင်ဖြစ်သူ ဟော်ဟဲမက်ဆီက အဆိုပါသတင်းမှာ မဟုတ်မှန်ကြောင်းနှင့် မက်ဆီအနေဖြင့် အနာဂတ်ကို မဆုံးဖြတ်ရသေးကြောင်း ပြောကြားခဲ့သည်။
