ပရော်ဖက်ရှင်နယ်ဘောလုံးသမားများအဖွဲ့ချုပ်(PFA)အမှုဆောင်ချုပ်ရွေးချယ်မည့်အဖွဲ့တွင် လူ့မည်းတစ်ဦးမျှ မပါဝင်ဘဲ လူဖြူပုဂ္ဂိုလ်များဖြင့်သာ ဖွဲ့စည်းခဲ့ခြင်းအတွက် အင်္ဂလန်ဘောလုံးလောကရှိ လူမည်းကစားသမားများ၊ လူမည်းနည်းပြများက ဒေါသထွက်လျက်ရှိနေကြကြောင်း သိရသည်။
PFA တွင် အသက်(၇၅)နှစ်အရွယ်ရှိပြီဖြစ်သည့် အင်္ဂလန်ဘောလုံးသမားဟောင်း ဂေါ်ဒွန်တေလာက ၁၉၈၁ ခုနှစ်ကတည်းက အမှုဆောင်ချုပ်အဖြစ် ဆောင်ရွက်နေပြီး ၎င်း၏နေရာတွင် အစားထိုးရန်စီစဉ်နေခြင်း ဖြစ်သည်။
PFA ဒါရိုက်တာအဖွဲ့ကို ရွေးချယ်ရမည့် (၃)ဦးပါ ကော်မတီအဖွဲ့တွင် မန်ယူအသင်းခေါင်းဆောင်ဟောင်း ဂယ်ရီနဗီးလ်က ဦးဆောင်မည်ဖြစ်ပြီး PFA ဘုတ်အဖွဲ့ဝင် အက်ဒ် ဝက်ကန်တီ၊ အောက်စဖို့ဒ်အသင်း နောက်ခံလူ ဂျွန်မော်ဆင်ဟိုတို့ပါဝင် ကြမည်ဖြစ်ကြောင်း သိရသည်။
၎င်းတို့က PFA ၏အမှုဆောင်မဟုတ်သော ဒါရိုက်တာ(၄)ဦးကို ရွေးချယ်မည်ဖြစ်ပြီး ၎င်းဒါရိုက်တာများက ဂေါ်ဒွန်တေလာနေရာအစားထိုးမည့်သူကို ရှာဖွေပေးရမည်ဖြစ်သည်။
PFA အမှုဆောင်ချုပ် ဂေါ်ဒွန်တေလာသည် နှစ်ပေါင်း(၄၀)နီးပါးကြာ သူဆုပ်ကိုင်ထားသောရာထူးမှ အနားယူတော့မည်ဆိုခြင်းကို ပြီးခဲ့သည့် ၂၀၁၉ ခုနှစ်အတွင်း၌ အတည်ပြုခဲ့သည်။
၂၀၁၉ မတ်လအတွင်း ပြုလုပ်ခဲ့သော PFA နှစ်ပတ်လည်အစည်းအဝေးတွင် အဖွဲ့အစည်းအတွင်း ဘဏ္ဍာရေးအခြေအနေများနှင့် ဂေါ်ဒွန်တေလာ၏လွှမ်းမိုးမှုများကို ဥက္ကဋ္ဌ ဘင်ပါကစ်က မေးခွန်းထုတ်ဝေဖန်ခဲ့ပြီးနောက် ၎င်းက ရာထူးကို စွန့်လွှတ်တော့မည်ဖြစ်ကြောင်း အတည်ပြုခဲ့ခြင်းဖြစ်သည်။
