မြန်မာ MMA ကစားသမား အောင်လအန်ဆန်သည် စက်တင်ဘာ ၂၄ ရက်က ထိုးသတ်သည့် One Revolution စိန်ခေါ်ပွဲတွင် အရေးနိမ့်ခဲ့သည့် လေ့ကျင့်ဖော် မာတင်ငုယင်ကို အားပေးနှစ်သိမ့်ခဲ့ကြောင်း သိရသည်။
စင်ကာပူနိုင်ငံ၌ ကျင်းပသည့် One Revolution ပြိုင်ပွဲတွင် ဗီယက်နမ်-သြစတြေးလျကစားသမား မာတင်ငုယင်သည် တောင်ကိုရီးယားနိုင်ငံသား ကင်ဂျေးဝန်ကို ပထမအချီမှာပင် အလဲထိုးဖြင့် အရေးနိမ့်ခဲ့ခြင်းဖြစ်သည်။
မာတင်ငုယင်သည် ပြီးခဲ့သည့်နှစ် အောက်တိုဘာက ထိုးသတ်သည့်ပွဲတွင် ရှုံးပွဲ ကြုံတွေ့ပြီး ONE ဖယ်သာဝိတ်တန်း ကမ္ဘာ့ချန်ပီယံဆု လက်လွှတ်ခဲ့ရသလို ယခုပြန်လည် ထိုးသတ်သည့်ပွဲတွင်လည်း ပထမအချီမှာပင် ရှုံးပွဲကြုံတွေ့ခဲ့ခြင်းဖြစ်သည်။ ထို့ကြောင့် မာတင်ငုယင်အနေဖြင့် ဖယ်သာဝိတ်တန်း ကမ္ဘာ့ ချန်ပီယံဆုအား ပြန်လည်စိန်ခေါ်နိုင်ရန် အချိန်ယူရဖွယ်ရှိနေပြီး ချန်ပီယံလုပွဲထိုးသတ် ခွင့်ရရန် စိန်ခေါ်ပွဲများ ထပ်မံထိုးသတ်ရမည် ဖြစ်သည်။
အောင်လအန်ဆန်သည် အမေရိကန်နိုင်ငံရှိ Sanford MMA လေ့ကျင့်ရေးခန်းမတွင် အတူလေ့ကျင့်လျက်ရှိသည့် မာတင်ငုယင်၏ပွဲကို ကူညီဆောင်ရွက်ပေးရန် စင်ကာပူနိုင်ငံသို့ လိုက်ပါလာခြင်းဖြစ်သည်။ အောင်လအန်ဆန်က မာတင်ငုယင်အား ရှုံးပွဲအတွက် စိတ်ဓာတ်မကျရန်အပြင် ၎င်းနှင့်အတူ အမြဲရပ်တည်သွားမည်ဖြစ်ကြောင်း လူမှုကွန်ရက်စာမျက်နှာတွင် ရေးသားဖော်ပြခဲ့သည်။
မာတင်ငုယင်ကလည်း ကင်ဂျေးဝန်အား ရှုံးနိမ့်ပြီးနောက် အားပေးသည့် မိသားစုဝင်များ၊ သူငယ်ချင်းများ၊ ပရိသတ်များကို ကျေးဇူးတင်ကြောင်း၊ အသန်မာဆုံးဖြစ်အောင် ပြင်ဆင်၍ ပြန်လာမည်ဖြစ်ကြောင်း လူမှုကွန်ရက်တွင် ရေးသားဖော်ပြခဲ့သည်။
