ONE Championship က စီစဉ်သည့် အထူးပွဲစဉ်အဖြစ် မြန်မာ MMA ကစားသမား အောင်လအန်ဆန်နှင့် ဘရာဇီးလ်နိုင်ငံသား အန်ဒရေဂါဗယ်အိုတို့ ယှဉ်ပြိုင်ထိုးသတ်မည်ဖြစ်ကြောင်း သိရသည်။
ONE Championship သည် ယခုနှစ်အတွင်း ကျင်းပသည့် ပြိုင်ပွဲအချို့တွင် အထူး ပွဲစဉ်များ ထည့်သွင်းကျင်းပလျက်ရှိပြီး ယခင်က နပန်းစည်းမျဉ်းသီးသန့် ထိုးသတ်ရသည့် ပွဲစဉ်၊ မွေထိုင်းနှင့် MMA စည်းမျဉ်း အလှည့် ကျအသုံးပြု၍ ထိုးသတ်ရသည့်ပြိုင်ပွဲများ ထည့်သွင်းကျင်းပဖူးသလို ယခုအကြိမ်တွင် MMA နှင့် နပန်းစည်းမျဉ်းကို အလှည့်ကျ အသုံးပြုယှဉ်ပြိုင်ရမည့်ပွဲစဉ် ထည့်သွင်းကျင်းပခြင်းဖြစ်သည်။
ယင်းပွဲစဉ်အဖြစ် ONE Championship အဖွဲ့အစည်းသည် နာမည် ကြီး ၀ိတ်တန်းနှစ်ခု ကမ္ဘာ့ချန်ပီယံဟောင်း အောင်လအန်ဆန်နှင့် နပန်းကမ္ဘာ့ချန်ပီယံဆုကို အကြိမ်ကြိမ်ရယူဖူးသည့် ဘရာဇီးလ်နိုင်ငံသား အန်ဒရေဂါဗယ်အိုတို့ပွဲစဉ်ကို စီစဉ်ထားခြင်းဖြစ်သည်။ ONE Championship ၏ ထုတ်ပြန်ချက်အရ လေးချီထိုးသတ်ရမည် ဖြစ်ပြီး ပထမနှင့် တတိယအချီကို စည်းမျဉ်း၊ ဒုတိယနှင့် စတုတ္ထအချီကို နပန်း စည်းမျဉ်းဖြင့် ထိုးသတ်ရမည်ဖြစ်သည်။
အန်ဒရေဂါဗယ်အိုသည် ONE Championship က စီစဉ်သည့် အထူးပွဲစဉ်တွင် ဒုတိယအကြိမ် ထိုးသတ်ရခြင်းဖြစ်ပြီး ၂၀၂၂ ခုနှစ် မတ် ၂၅ ရက်က ONE မစ်ဒယ်ဝိတ်တန်းနှင့် လိုက်ဟဲဗီးဝိတ်တန်း ကမ္ဘာ့ချန်ပီယံ နယ်သာလန်နိုင်ငံသား ဒီရစ်ဒါနှင့် နပန်းစည်းမျဉ်းဖြင့် ထိုးသတ်ရာ အရှုံးအနိုင်မပေါ်ဘဲ သရေကျခဲ့သည်။
အောင်လအန်ဆန်သည် ၂၀၂၂ ခုနှစ် ဖေဖော်ဝါရီ ၂၅ ရက်က ရုရှားနိုင်ငံသား ဗစ်တာလီဘစ်ဒက်ရှ်နှင့် မစ်ဒယ်ဝိတ်တန်းစိန် ခေါ်ပွဲ ထိုးသတ်ပြီးနောက် ယခုအထူးပွဲစဉ် ထိုးသတ်ရမည်ဖြစ်သည်။ ONE Championship အနေဖြင့် ယင်းပြိုင်ပွဲ ထည့်သွင်းကျင်းပ မည့်ရက်ကို အတည်ပြုထုတ်ပြန်ခြင်းမရှိသေးသော်လည်း သြဂုတ်လကုန်အထိ ကျင်းပမည့် ပြိုင်ပွဲများတွင် ပါဝင်ခြင်းမရှိသေးသဖြင့် အစောဆုံး စက်တင်ဘာမှသာ ထိုးသတ်ရဖွယ် ရှိနေသည်။
အောင်လအန်ဆန်သည် ယခင်က ချုပ်ကွက်များဖြင့် နာမည်ကြီးခဲ့သော်လည်း ယခုနောက်ပိုင်း ထိုးသတ်သည့်ပွဲများတွင် Ground Fight အပိုင်း အားနည်းချက်များရှိခဲ့ ပြီး ဒီရစ်ဒါကို အရေးနိမ့်ခဲ့သည့် မစ်ဒယ်ဝိတ်တန်းနှင့် လိုက်ဟဲဗီးဝိတ်တန်း ကမ္ဘာ့ချန်ပီယံ ကာကွယ်ပွဲနှစ်ပွဲစလုံး ချုပ်ကွက်များဖြင့် ဖိအားပေးခံခဲ့ရခြင်းဖြစ်သည်။
အောင်လအန်ဆန်သည် ယင်းနှစ်ပွဲအပြီးတွင် Ground Fight များကို ဦးစားပေး လေ့ကျင့်နေကြောင်း ပရိသတ်များကို အသိပေးထားပြီး ယခုပွဲတွင် Ground Fight တိုး တက်လာမှုကို မြင်တွေ့ရဖွယ်ရှိနေသည်။ အောင်လအန်ဆန်သည် ကမ္ဘာ့ချန်ပီယံခါး ပတ်နှစ်ခုစလုံး လက်လွှတ်ခဲ့ရပြီးနောက်ပိုင်း မစ်ဒယ်ဝိတ်တန်းပွဲစဉ်များသာ ထိုးသတ်ရန် ဆုံးဖြတ်ထားသူဖြစ်ပြီး စိန်ခေါ်ပွဲများ မထိုးသတ်မီ ONE Championship က စီစဉ်သည့် အထူးပွဲစဉ် ထိုးသတ်ရခြင်းဖြစ်သည်။
အောင်လအန်ဆန်သည် မစ်ဒယ်ဝိတ်တန်းနှင့် လိုက်ဟဲဗီးဝိတ်တန်း ကမ္ဘာ့ချန်ပီယံအဖြစ် ကာလအတန်ကြာ ရပ်တည်နိုင်ခဲ့သော်လည်း မစ်ဒယ်ဝိတ်တန်း ချန်ပီယံဆုကို ၂၀၂၀ ပြည့်နှစ် အောက်တိုဘာ၊ လိုက်ဟဲဗီးဝိတ်တန်း ချန်ပီယံဆုကို ၂၀၂၁ ခုနှစ် ဧပြီလတွင် လက်လွှတ်ခဲ့ရခြင်းဖြစ်သည်။ အောင်လအန်ဆန်သည် အသက် ၃၇ နှစ်ကျော်ပြီဖြစ်ရာ နှစ်အနည်းငယ်သာ ထပ်မံထိုးသတ်နိုင်ဖွယ်ရှိနေသည်။
