ရီးယဲလ်အသင်းမှ အင်္ဂလန်ကွင်းလယ်ကစားသမား ဘယ်လင်ဟမ်က Golden Boy ဆု ရရှိသည့်အတွက် ဂုဏ်ယူကြောင်း ဆုပေးပွဲအခမ်းအနားတွင် ပြောကြားခဲ့သည်။
၂၀၂၃ ခုနှစ်အတွက် Golden Boy ဆုပေးပွဲကို အီတလီနိုင်ငံ၊ တူရင်မြို့တွင် ဒီဇင်ဘာ (၄)ရက်နေ့က ပြုလုပ်ခဲ့ပြီး ဘယ်လင်ဟမ်က တက်ရောက်ရယူခဲ့သည်။
Golden Boy ဆုကို တူရင်မြို့အခြေစိုက် အီတလီအားကစားသတင်းစာ Tuttosport က ဦးစီး၍ ဥရောပမှ နာမည်ကျော်အားကစားသတင်းစာများစွာမှ ဂျာနယ်လစ်များ၏ ဆန္ဒမဲဖြင့် ရွေးချယ်ချီးမြှင့်ခြင်းဖြစ်သည်။
ယခုဆုမှာ ဥရောပရှိ နိုင်ငံအလိုက်အမြင့်ဆုံးအတန်းများတွင် ယှဉ်ပြိုင်ကစားနေသည့် ကစားသမားများထဲမှ အသက်(၂၁)နှစ်အောက် ကစားသမားများသာ မျှော်လင့်ခွင့်ရှိသည့်ဆုလည်းဖြစ်သည်။
ဘယ်လင်ဟမ်(၂၀ နှစ်)သည် ပြီးခဲ့သည့်ရာသီက ဒေါ့မွန်အသင်းတွင် ခြေစွမ်းပြခဲ့သလို၊ ယခုရာသီတွင်လည်း ရီးယဲလ်အသင်းတွင် ခြေစွမ်းပြနိုင်သောကြောင့် Golden Boy ဆုရရှိခဲ့ခြင်းဖြစ်သည်။
ဆုပေးပွဲတွင် ၎င်းက ”Golden Boy ဆုရရှိတဲ့အတွက် ဂုဏ်ယူပါတယ်။ ကျွန်တော့်ရဲ့ အောင်မြင်မှုလျှို့ဝှက်ချက်ကတော့ အကယ်ဒမီမှာရှိစဉ် ကလေးဘဝကတည်းက တာဝန်ယူမှုရှိတာပါပဲ။ ဒီအရာကို ကျွန်တော် သဘောကျပါတယ်။ ကျွန်တော် နေ့တိုင်း ပိုကောင်းချင်ပြီး ရီးယဲလ်ကိုလည်း ကူညီချင်ပါတယ်။ လက်ရှိ ကျွန်တော့်ရဲ့ ဦးတည်ချက်က ဒါပါပဲ”ဟု ဆိုခဲ့သည်။
