ဆယ်စုနှစ်တစ်ခုကျော်ကြာ အငြင်းပွားလာခဲ့သည့် မက်ဆီနှင့် စီရော်နယ်လ်ဒိုနှစ်ဦးအကြား GOAT (ထာဝရအကောင်းဆုံး) နှိုင်းယှဉ်မှုတွင် မက်ဆီက ပိုသာကြောင်း သုတေသနပညာရှင်တစ်ဦးက အချက်အလက်များအပေါ်အခြေခံ၍ ထုတ်ဖော်ကြေညာခဲ့သည်။
ယင်းကဲ့သို့ ပြောကြားသူမှာ ယခုရာသီကုန်တွင် လီဗာပူးလ်အသင်း သုတေသနဒါရိုက်တာအဖြစ်မှနုတ်ထွက်မည့် ဒေါက်တာအီယန်ဂရေဟမ်ဆိုသူဖြစ်ပြီး ၎င်းက ချယ်လ်တင်ဟမ်သိပ္ပံပွဲတော်သို့ တက်ရောက်လာသူများအား ပြောကြားခဲ့ခြင်းဖြစ်သည်။
အီယန်ဂရေဟမ်သည် လီဗာပူးလ်အသင်းတွင် သုတေသနဒါရိုက်တာအဖြစ် ၁၁ နှစ်ကြာ ဆောင်ရွက်ခဲ့သူဖြစ်ပြီး မက်ဆီနှင့် စီရော်နယ်လ်ဒိုနှစ်ဦး၏ သက်ဆိုင်ရာအသင်းများ အောင်မြင်မှုရရှိရေးအတွက် ပါဝင်ကူညီပေးမှုအပေါ် ခေတ်မီဆန်းသစ်သည့် အချက်အလက်များအသုံးပြု၍ နှိုင်းယှဉ်ထားခြင်းဖြစ်ကြောင်း သိရသည်။

“ခြားနားချက်ကတော့ မက်ဆီက ကမ္ဘာ့အဆင့် ကွင်းလယ်တိုက်စစ် ကစားသမားတစ်ဦးလည်း ဖြစ်ပါတယ်။ အသင်းဖော်တွေအတွက် သူ့ရဲ့ အခွင့်အရေးဖန်တီးပေးနိုင်မှုက ရော်နယ်လ်ဒိုထက် ပိုသာပါတယ်။ မက်ဆီက အလုပ်နှစ်ခုကို ထူးချွန်စွာ လုပ်နိုင်ပါတယ်။ ရော်နယ်လ်ဒိုက အလုပ်တစ်ခုကိုပဲ ထူးချွန်စွာ လုပ်နိုင်ပါတယ်။ အဲဒါက ခြားနားချက်ပါပဲ” ဟု ဒေါက်တာ အီယန်ဂရေဟမ်က ဆိုသည်။
မက်ဆီ-စီရော်နယ်လ်ဒို စွမ်းဆောင်ရည်နှိုင်းယှဉ်မှု
အမျိုးအစား မက်ဆီ စီရော်နယ်လ်ဒို
ကလပ်အသင်း ပွဲ/ဂိုး ၈၅၃ ပွဲ/၇၀၄ ဂိုး ၉၆၈ ပွဲ/၇၁၅ ဂိုး
နိုင်ငံတကာ ပွဲ/ဂိုး ၁၇၄ ပွဲ/၁၀၂ ဂိုး ၁၉၈ ပွဲ/၁၂၂ ဂိုး
ဂိုးဖန်တီးမှု ၃၅၇ ကြိမ် ၂၃၆ ကြိမ်
ဟက်ထရစ် ၅၇ ကြိမ် ၆၂ ကြိမ်