မန်ချက်စတာ ယူနိုက်တက် တိုက်စစ်မှူးလေး မေဆင် ဂရင်းဝုဒ် ဟာ အသင်းနဲ့ ရာသီကြို ပြင်ဆင် လေ့ကျင့်မှုတွေ ကို ပြုလုပ်ရင်း သူ့ကို အားပေးကြတဲ့ ပရိသတ်တွေ နဲ့ အမေး အဖြေ ကဏ္ဍလေးကို ပြုလုပ် တင်ဆက် ပေးသွားခဲ့ ပါတယ် ။ ကမ္ဘာတစ်ဝှမ်း က ထောင်ပေါင်း များစွာသော ပရိသတ်တွေ ရဲ့ မေးခွန်းတွေ ထဲက အချို့ ကို တိုက်စစ်မှူးလေးက အဖြေပေး ခဲ့ပြီး အဲ့ဒိ အထဲမှာ အင်ဒို ၊ မလေးရှား နဲ့ စင်္ကာပူ က ပရိသတ်တွေရဲ့ မေးခွန်းတွေလည်း ပါရှိခဲ့ ပါတယ် ။
ဒီမေးခွန်းတွေ ထဲက စိတ်ဝင်စားစရာ မေးခွန်း အချို့ကို ပြန်လည် ဖော်ပြပေးလိုက်ရပါတယ် –
Palash D ( India ) : လက်ရှိ မန်ချက်စတာ ယူနိုက်တက် ထဲမှာ ဘယ်သူ့ကို မင်း အတုယူလေ့လာနေသလဲ ?
Greenwood : မေးခွန်းကောင်း တစ်ခုပါပဲ ၊ ယူနိုက်တက် မှာ အက်ဒီ ( ကာဗာနီ ) က ထိပ်တန်း တိုက်စစ်မှူး တစ်ယောက် အဖြစ်ရော မိတ်ဆွေကောင်း တစ်ယောက် အဖြစ်နဲ့ပါ ရှိနေတာ အသိသာကြီးပါ ။ နောက်ထပ် ၂ ယောက် ရှိပါသေးတယ် ၊ ဟွမ်မာတာ နဲ့ နီမန်ဂျာ ( မာတစ် ) တို့ပါပဲ ။ သူတို့ရဲ့ အလုပ်ကြိုးစားမှု နဲ့ ခေါင်းဆောင်နိုင်စွမ်း တွေက တကယ်အံ့သြစရာပါ ။ သူတို့တွေက လူငယ်တွေအတွက် စံပြုလောက်တဲ့ ကစားသမားတွေပါပဲ ။
Ilham W ( Indonesia ) : ဘာလို့ နံပါတ် ၁၁ ကို ရွေးခဲ့တာလဲ ၊ ဒီနံပါတ် ဝတ်ရလို့ ဂုဏ်ယူလား ?
Greenwood : ဒီနံပါတ် က မန်ချက်စတာ ယူနိုက်တက် ရဲ့ ကြီးကျယ် ခမ်းနားပြီး အမှတ်အသား တစ်ခုလို ဖြစ်ခဲ့တဲ့ နံပါတ်ပါ ။ ဒါက ကျွန်တော် ဒီနံပါတ် ကို ရွေးခဲ့ရတဲ့ အကြောင်းအရင်း တစ်ခုပါပဲ ။ ဒါကို ဂုဏ်ယူစွာနဲ့ ဝတ်ဆင်နေတာပါ ။ ရိုင်ယန်ဂစ် နှစ်ပေါင်းများစွာ ဝတ်ဆင်ပြီး အောင်မြင်ခဲ့တဲ့ နံပါတ်ကို ဝတ်ရပြီး သူ့ရဲ့ ခြေရာကို လိုက်နင်းနိုင်ဖို့ ကြိုးစားရတာက ကြီးမားတဲ့ စိန်ခေါ်မှုပါပဲ ။ ကျွန်တော် အကောင်းဆုံး လုပ်နိုင်မယ်လု့ိ မျှော်လင့် ပါတယ် ။
Andrew B ( UK ) : ဘောလုံးအပြင် အခြား ဝါသနာပါတာတွေ ရှိလား ?
Greenwood : ကျွန်တော် ဝါသနာ ပါတာတွေ အများကြီး ရှိပါတယ် အန်ဒရူး ရေ ၊ ဂိမ်း ကစားတာမျိုးပေါ့ ။ အခုခေတ် လူငယ်တွေ အားလုံး ဂိမ်းကစားကြတယ်လေ ၊ ဟုတ်တယ်မဟုတ်လားဗျ ။ အားတဲ့ အချိန်တွေ မှာ ဆိုရင် သူငယ်ချင်းတွေနဲ့ Call of Duty ကို အများကြီး ကစားဖူးပါတယ် ။
Peter A ( USA ) : မေဆင်ရေ ၊ မက်ဆီ နဲ့ ရိုနယ်ဒို တိ့ု အကြားမှာ ရွေးချယ်ရမယ်ဆိုရင် ဘယ်သူက အကောင်းဆုံးလို့ မင်းထင်သလဲ ?
Greenwood : ကျွန်တော့ အတွက်တော့ အမြဲတမ်း မက်ဆီ ပါပဲ ။ သူက တစ်ခြားဂြိုဟ်က လာတဲ့သူလို့ တင်စားရမယ့် ကစားသမားပါ ။ ရိုနယ်ဒို က တကယ့် အံ့ဖွယ် ကစားသမား ဆိုတာ အသိသာကြီး ပါပဲ ။ သူ့ရဲ့ ကာယ ၊ အားကစားစိတ်ဓါတ် တွေက တကယ့် အံ့ဖွယ်ပါ ။ ဒါပေမယ့် မက်ဆီ က သူ့ရဲ့ အရွယ်အစားလေး နဲ့ ဘာတွေ လုပ်ပြခဲ့တယ် ၊ ဘာစီလိုနာ နဲ့ အာဂျင်တီးနား တိ့ုနဲ့ ဆုဖလားတွေ ယူနိုင်ခဲ့တယ် ၊ ဒါတွေက ဘယ်သူမှ လိုက်မမီတဲ့ နောက်တစ်ဆင့် ပါပဲ ။
Fred H ( Ireland ) : ကလေးဘ၀ တုန်းက မင်း အကြိုက်ဆုံး ဘောလုံး စကေး က ဘာဖြစ်မလဲ ?
Greenwood : ကျွန်တော့ အကြိုက်ဆုံး ဘောလုံး စကေးက Stepover ပါ ၊ ဒါကို အခုထိ သုံးနေတုန်းပါပဲ ။ ကျွန်တော့ အကြိုက်ဆုံး စကေးပါ ။ ဘရာဇီး ရိုနယ်ဒိုကြီး ရဲ့ Stepover Skill တွေကို ကျွန်တော် လေ့လာခဲ့ ပါတယ် ။ သူက ဒီဟာကို သုံးပြီး ဂိုးသမားတွေ ၊ နောက်ခံလူတွေကို လှည့်စား ကျော်ဖြတ်နိုင်ခဲ့တာပါ ။ စပြီး လေ့ကျင့်တုန်းက ပန်းခြံထဲမှာ အကူပစ္စည်းတွေနဲ့ လုပ်ခဲ့ပါတယ် ၊ ပြီးတော့ လေ့ကျင့်ရေးကွင်းမှာလည်း လေ့ကျင့်ပါတယ် ၊ နောက်ဆုံးမှာတော့ ကစားပွဲထဲမှာ သုံးကြည့်နိုင်ခဲ့ပါတယ် ။ အခုတော့ ဒါက ကျွန်တော် ပိုင်နိုင်တဲ့ အရာ ဖြစ်လာခဲ့ပါပြီ ။
Karl D ( Ireland ) : မန်ချက်စတာ ယူနိုက်တက် မှာ အရယ်ရဆုံး ကစားသမား ၃ ယောက်ကို ပြောပြပါဦး
Greenwood : ၃ ယောက်လား . . . လုခ်ရှော က ကျွန်တော့ကို ခနခန ရယ်စေတယ်ဗျ ၊ ပြီးတော့ ဟန်ဒါဆင် ပေါ့ ။ ဒီ ၂ ယောက် က အရယ်ရဆုံး ပါပဲ ၊ တတိယ တစ်ယောက်လား . . . ကျွန်တော့ ကတော့ ဂျင်မီ ဂါနာ ကို ရွေးချယ်ပါတယ် ၊ သူက ကျွန်တော့ရဲ့ အခင်ဆုံး သူငယ်ချင်း ဖြစ်သလို ကျွန်တော် နဲ့ ဟာသတွေ ပြောလေ့ ရှိတဲ့သူပါ ၊ အရယ်ရဆုံး ၃ ယောက်ဆိုရင်တော့ သူတို့ကိုပဲ ရွေးရမှာပါပဲ ။
