ယခုရာသီ FA ဖလားပြိုင်ပွဲ၌ ချန်ပီယံဆုရရှိသည့်အသင်းသည် ယခင်နှစ်များကဲ့သို့ ဝင်ဘလေကွင်းမှ Royal Box တွင် အောင်ပွဲခံခွင့်ရမည်မဟုတ်ကြောင်း သိရသည်။
FA ဖလားမှာ ဘောလုံးလောက၌ ရှေးအကျဆုံးပြိုင်ပွဲဖြစ်သလို၊ အင်္ဂလန်ဘောလုံးလောကတွင်လည်း အစဉ်အလာကြီးမားသည့်အတွက် ဗြိတိန်မင်းသား ဝီလျံကိုယ်တိုင် တက်ရောက်ချီးမြှင့်လေ့ရှိသည်။
ချန်ပီယံအသင်းအနေဖြင့် ဝင်ဘလေကွင်းအတွင်းမှ Royal Box တွင် ဆုဖလားကိုင်မြှောက်၍ အောင်ပွဲခံခွင့်ရရှိခြင်းမှာလည်း ဂုဏ်ယူစရာ အစဉ်အလာတစ်ရပ်ဖြစ်သည်။
သို့သော် ယခုရာသီတွင် ကိုရိုနာဗိုင်းရပ်စ်ကပ်ဘေးနှင့် ရင်ဆိုင်နေရပြီး ပရိသတ်မပါဘဲ ယှဉ်ပြိုင်ကစားရမည်ဖြစ်သောကြောင့် ယင်းအစီအစဉ်ကို ဖျက်သိမ်းလိုက်ခြင်းဖြစ်ကြောင်း သိရသည်။
ထို့ပြင် အင်္ဂလန်ဘောလုံးအဖွဲ့ချုပ် (FA) ၏ ဥက္ကဋ္ဌအဖြစ် ဆောင်ရွက်နေသော ဗြိတိန်မင်းသား ဝီလျံမှာလည်း FA ဖလားဗိုလ်လုပွဲကို လာရောက်အားပေးကြည့်ရှုမည်မဟုတ်ဘဲ ပွဲအပြီးတွင် Videolink မှတစ်ဆင့်သာ ဆုဖလားချီးမြှင့်ပေးသွားမည်ဖြစ်ကြောင်း သိရသည်။
ယခုရာသီ FA ဖလားဗိုလ်လုပွဲတွင် လန်ဒန်မြို့ခံပြိုင်ဘက်နှစ်သင်းဖြစ်သည့် အာဆင်နယ်နှင့် ချယ်လ်ဆီးတို့ ယှဉ်ပြိုင်ကစားရမည်ဖြစ်ပြီး သြဂုတ်(၁)ရက်နေ့ မြန်မာစံတော်ချိန် ည(၁၁း၀၀)နာရီတွင် ယှဉ်ပြိုင်မည်ဖြစ်သည်။
ပြိုင်ပွဲ ဝင်အသင်းနှစ်သင်းအနေဖြင့် ယင်းပွဲတွင် အသင်းမှ ကစားသမား(၁၀)ဦးစီ ထပ်ဆောင်းခေါ်ယူခွင့်ရရှိမည် ဖြစ်ကြောင်းလည်း သိရသည်။
