ရီးယဲလ်မက်ဒရစ်အသင်းခေါင်းဆောင် နောက်ခံလူ ရာမို့စ်သည် ပြီးခဲ့သည့် ဧပြီ (၁၀)ရက်နေ့ကယှဉ်ပြိုင်ခဲ့သော လာလီဂါပွဲစဉ် (၃၀) ရီးယဲလ်မက်ဒရစ် ( ၂-၁ ) ဘာစီလိုနာ El Clásico ပွဲစဉ်အား ဆယ်စုနှစ်တစ်ခုအတွင်း ပထမဆုံးအကြိမ်အဖြစ်လွဲချော်ခဲ့ကြောင်း သိရသည်။
အသက် (၃၅)နှစ်အရွယ်ရှိ စပိန်ဝါရင့်နောက်ခံလူ ရာမို့စ်သည် ပြီးခဲ့သည့်နိုင်ငံတကာရက်သတ္တပတ်က စပိန်လက်ရွေးစင်အသင်းနှင့်ပူးပေါင်းစဉ်ရရှိခဲ့သည့် ခြေသလုံးကြွက်သားနာကျင်မှုဒဏ်ရာကြောင့် ယခု El Clásico ပွဲစဉ်ကို လွဲချော်ခဲ့ခြင်းဖြစ်ပြီး ယင်းမှာ ၎င်း၏ရီးယဲလ်ကစားသမားဘဝ El Clásico လာလီဂါပွဲစဉ်အား ပထမဆုံး အကြိမ်လွဲချော်ခြင်းဖြစ်ခဲ့သည်။
ရာမို့စ်သည် ၂၀၀၅ ခုနှစ် နွေရာသီအပြောင်းအရွှေ့က ဆီဗီလာအသင်းမှ ရီးယဲလ်အသင်းသို့ပြောင်းရွှေ့လာသူဖြစ်ပြီး ၎င်းရီးယဲလ်အသင်းသို့ စတင်ရောက်ရှိချိန်မှစ၍ ယခုပွဲစဉ်မတိုင်မီအထိ ဘာစီလိုနာအသင်းနှင့် ပြိုင်ပွဲစုံထိပ်တိုက်တွေ့ဆုံမှုမှာ (၄၇)ပွဲအထိ ရှိခဲ့သည်။
ယင်း (၄၇)ပွဲတွင် ရာမို့စ်သည် (၄၅)ပွဲ အထိပါဝင်ကစားခဲ့ပြီး ရီးယဲလ်ကစားသမားဘဝ ၎င်းလွဲချော်ခဲ့သည့် El Clásico ပွဲစဉ်မှာ ၂၀၁၀-၁၁ ရာသီချန် ပီယံလိဂ်ဆီမီးဖိုင်နယ် ဒုတိယအကျော့ ရီးယဲလ်မက်ဒရစ် (၁-၁) ဘာစီလိုနာပွဲစဉ်နှင့် ၂၀၁၂-၁၃ ရာသီ စပိန်ဘုရင့်ဖလားဆီမီးဖိုင်နယ် ပထမအကျော့ ရီးယဲလ်မက်ဒရစ် (၁-၁) ဘာစီလိုနာပွဲစဉ် (၂)ပွဲသာရှိခဲ့သည်။
ထို့ပြင် ရာမို့စ်အနေဖြင့် El Clásico ပွဲစဉ်သမိုင်းတစ်လျှောက် ပွဲအများဆုံး ကစားထားသူအဖြစ် မူလက တစ်ဦးတည်းလွတ်လွတ်ကျွတ်ကျွတ်မှတ်တမ်းဝင်ထားနိုင်သော်လည်း ယခုပွဲလွဲချော်ခဲ့မှုကြောင့် ၎င်း၏စံချိန်အား ဘာစီလိုနာအသင်းခေါင်းဆောင် မက်ဆီကလိုက်မီခဲ့သည်
မက်ဆီသည် ယခုပွဲမတိုင်မီက ကစားသမားဘဝ ပြိုင်ပွဲစုံ El Clásico ပြိုင်ပွဲစုံပွဲစဉ် (၄၄)ပွဲကစားထားပြီး ရာမို့စ်၏ နောက် ဒုတိယပွဲအများဆုံးကစားသူအဖြစ်ရပ်တည်နေသော်လည်း ယခုပွဲစဉ်တွင်ပါဝင်ကစားပြီးနောက် ရာမို့စ် ၏စံချိန် (၄၅ ပွဲ)အား လိုက်မီခဲ့ပြီဖြစ်သည်။
မက်ဆီသည် El Clásico ပွဲစဉ်သမိုင်းတွင် ပွဲအများဆုံးကစားသူအဖြစ် ပူးတွဲစံချိန်တင်နိုင်ခဲ့ပြီဖြစ်သလို ဂိုးအများဆုံးသွင်းယူသူအဖြစ်လည်း (၂၆)ဂိုးသွင်းယူကာ စံချိန်တင်ထားနိုင်သူဖြစ်သည်။
ရာမို့စ်နှင့် မက်ဆီတို့နောက် El Clásico ပွဲစဉ်သမိုင်းတွင် လက်ရှိကစားနေဆဲကစားသမားများထဲမှ ပွဲအများဆုံးကစားထားသူများမှာ ဘူးစကွက်စ် (ဘာစီလိုနာ၊ ၄၀ ပွဲ)၊ ပီကေး (ဘာစီလိုနာ၊ ၃၇ ပွဲ)နှင့် ဘန်ဇီမာ (ရီးယဲလ်မက်ဒရစ်၊ ၃၆ ပွဲ)တို့ဖြစ်ကြောင်းသိရသည်။
