COVID-19 ရောဂါကူးစက်မှု ဆက်လက်မြင့်တက်နေသဖြင့် တင်းကျပ်သော စည်းမျဉ်းအသစ်များ ပရီးမီးယားလိဂ်ထုတ်ပြန်

ဗြိတိန်နိုင်ငံတွင် COVID-19 ရောဂါကူးစက်မှု ဆက်လက်မြင့်တက်နေသဖြင့် ကလပ်အသင်းများ နှင့် ကစားသမားများ လိုက်နာရမည့် တင်းကျပ်သော စည်းမျဉ်းအသစ်များကို ပရီးမီးယားလိဂ်ပြိုင်ပွဲက ထုတ်ပြန်လိုက်ကြောင်း သိရသည်။

ဗြိတိန်နိုင်ငံတစ်ဝန်း COVID-19 ရောဂါတွေ့ရှိမှုမှာ တစ်ရက်လျှင် ပျမ်းမျှ ၅၀၀၀၀ အထက်ရှိသလို သေဆုံးသူအရေအတွက်မှာလည်း နေ့စဉ်ထောင်ဂဏန်းအထိရှိနေသည်။ ပြီးခဲ့သည့်တစ်ပတ်က ပရီးမီးယားလိဂ်ပွဲစဉ်များ ရွှေ့ဆိုင်းရမှုရှိသလို ယခုတစ်ပတ်တွင်လည်း FA ဖလား နှင့် အောက်တန်းလိဂ်ပွဲစဉ်အချို့ ရွှေ့ဆိုင်းရမှုများ ရှိနေသောကြောင့် ပရီးမီးယားလိဂ်က စည်းမျဉ်းသစ် အချို့ ထပ်မံထုတ်ပြန်ခဲ့ခြင်းဖြစ်သည်။

အသစ်ထုတ်ပြန်လိုက်သည့် စည်းမျဉ်းများမှာ ပရီးမီးယားလိဂ် စည်းကမ်းပိုင်းဆိုင်ရာတာဝန်ရှိသူများအား COVID လုပ်ထုံးလုပ်နည်းများ လိုက်နာရေးအတွက် ပိုမိုကျယ်ပြန့်သည့်တာဝန်ပေးအပ်ရန်၊ ပွဲကစားသည့်နေ့တွင် ကွင်းအတွင်း၌ ရှိသူအားလုံး မျက်နှာ/နှာခေါင်းစည်း အမြဲတပ်ဆင်ထားရန်၊ ပွဲကစားနေသူနှင့် သွေးပူလေ့ကျင့်ခန်းပြုလုပ်သူများသာ ခြွင်းချက်အဖြစ် ခွင့်ပြုမည်ဖြစ်ပြီး အရန်ခုံတွင် ထိုင်နေသူအားလုံး မျက်နှာ/နှာခေါင်းစည်းတပ်ဆင်ရန်၊ ကလပ်အသင်းများအနေဖြင့် ပွဲကစားရန်အတွက် သွားရောက်ရာတွင် ယခင်က ကားနှစ်စီးအစား သုံးစီးအသုံးပြုရန်၊ စားသောက်ခန်း အသုံးပြုမှုကို ပိုကန့်သတ်၍ ကစားသမားများနှင့် ဝန်ထမ်းများအား ဝေးကွာသောနေရာများ၌ စားသောက် ရေးအတွက် တွန်းအားပေးရန်၊ လေ့ကျင့်ရေးကွင်းများရှိ လူဦးရေကို ပို၍ကန့်သတ်နိုင်ရေး ကြိုးပမ်းရန်၊ ကစားသမားများနှင့် ဝန်ထမ်းများ ထိတွေ့မှုရှိနိုင်သည့် ဆုံမှတ်နေရာများရှိ အရေအတွက်ကို တင်းကျပ်စွာကန့် သတ်ရန် စသည့်အချက်များဖြစ်ကြောင်း သိရသည်။

ကိုရိုနာဗိုင်းရပ်စ်နှင့်ပတ်သက်သည့် လုပ်ထုံးလုပ်နည်းများအား အတိအကျလိုက်နာရန် သတိပေးကြောင်း ပရီးမီးယားလိဂ်က ကလပ်အသင်းအားလုံးထံ အကြောင်းကြား စာပေးပို့ထားပြီး စည်းကမ်းချိုးဖောက်သူများကို ကလပ်အသင်း သို့မဟုတ် ပြိုင်ပွဲကျင်းပရေးအဖွဲ့က အရေးယူမည်ဖြစ်ကြောင်း ထည့်သွင်းဖော်ပြထားသည်။ ” လေ့ကျင့်ရေးကွင်းနှင့် ပွဲကစားသည့်နေ့တွင် လိုက်နာရမည့် လုပ်ထုံးလုပ်နည်း ချိုးဖောက်သူများကို စုံစမ်းစစ်ဆေး၍ ကလပ်အသင်းများက အရေးယူခြင်းအပေါ် အများပြည်သူ၊ အစိုးရ၊ ပြိုင်ပွဲနှင့်သက်ဆိုင်သူများက ယုံကြည်မှုရှိရေးလုပ်ဆောင်ရန် လိုအပ်သည်။ လုပ်ထုံးလုပ်နည်းများ လိုက်နာရန် ပျက်ကွက်ပါက ထိုသူကို လိဂ်ပြိုင်ပွဲက အရေးယူခြင်း (ဥပမာ-ကျူးလွန်သူ၏အပြုအမူမှာ လိဂ်ပြိုင်ပွဲ၏ ဂုဏ်သိက္ခာကို ထိခိုက်စေခြင်း) သို့မဟုတ် ကလပ်အသင်းက အရေးယူခြင်း (ကျူးလွန်သူ၏အပြုအမူမှာ လေ့ကျင့်ရေးကွင်းဆိုင်ရာ လုပ်ထုံးလုပ်နည်း ချိုးဖောက်ခြင်း) ပြုလုပ်မည်ဖြစ်သည်” ဟု ပရီးမီးယားလိဂ်၏ ထုတ်ပြန်ချက်တွင် ဖော်ပြထားသည်။

ထို့ပြင် ပရော်ဖက်ရှင်နယ်ဘောလုံးသမားများအဖွဲ့ချုပ် (PFA) ကလည်း ကစားသမားများအနေဖြင့် ဂိုးသွင်းပြီးပါက အုပ်စုလိုက် အောင်ပွဲခံခြင်းမပြုလုပ်ရန် ထပ်မံ သတိပေးခဲ့ကြောင်း သိရသည်။ COVID-19 ပထမလှိုင်းဖြစ်ပွားပြီးနောက် ဘောလုံးပွဲများ တစ်ကျော့ပြန်စတင်စဉ် ကစားသမားများအနေဖြင့် ဂိုးသွင်းယူပြီးပါက အချင်းချင်း ပွေ့ဖက်အောင်ပွဲခံခြင်းအစား Social Distancing ပုံစံဖြင့် အောင်ပွဲခံခဲ့ကြသော်လည်း လက်ရှိအချိန် တွင် ရောဂါကူးစက်မှုမြင့်တက်နေသလို ပွေ့ဖက်အောင်ပွဲခံမှုများရှိ နေသဖြင့် PFA ဥက္ကဋ္ဌ ဂေါ်ဒွန်တေလာက သတိပေးခဲ့ခြင်းဖြစ်သည်။ ” အောင်ပွဲခံတာကို ကျွန်တော်နားလည်ပါတယ်။ ဂိုးပေါက်အနောက်ထဲကို ဘောလုံးရောက်သွားဖို့ဆိုတာ တကယ်ခက်ခဲတာကြောင့် ဂိုးဝင်သွားပြီးချိန်မှာ ဘယ်လိုလုပ်ရမလဲဆိုတာ တွေးထားဖို့ မလွယ်ပါဘူး။ ဒါပေမဲ့ လုပ်ထုံးလုပ်နည်းတွေကို ဆက်ပြီးလိုက်နာဖို့က အရေးကြီးပါတယ်” ဟု ၎င်းက ဆိုသည်။