COVID-19 ရောဂါ ကူးစက်မှုဂယက် ကြောင့် ရက်သတ္တပတ်အတွင်း ရွှေ့ဆိုင်းရ သည့် ပရီးမီးယားလိဂ်ပွဲစုစုပေါင်း ကိုးပွဲအထိ ရှိလာပြီဖြစ်ကြောင်း သိရသည်။
အင်္ဂလန်အပါအဝင် ဥရောပနိုင်ငံများ၌ COVID-19 ရောဂါ စတုတ္ထလှိုင်းဖြစ်ပွား နေသောကြောင့် ပြီးခဲ့သည့်တနင်္ဂနွေနေ့မှစ၍ ယခုတစ်ပတ် တနင်္ဂနွေနေ့အထိ ရှစ်ရက်အတွင်း ပရီးမီးယားလိဂ်ပွဲစုစုပေါင်း ကိုးပွဲ အထိ ရွှေ့ဆိုင်းထားရခြင်းဖြစ်သည်။
ရွှေ့ဆိုင်းခဲ့ရသည့်ပွဲများမှာ ပွဲစဉ် ၁၆ အဖြစ် ဒီဇင်ဘာ ၁၂ ရက်တွင်ကစားမည့် ဘရိုက်တန်-စပါး၊ ပွဲစဉ် ၁၇ အဖြစ် ဒီဇင်ဘာ ၁၄ ရက်တွင်ကစားမည့် ဘရန့်ဖို့ဒ်-မန်ယူ၊ ဒီဇင်ဘာ ၁၅ ရက်တွင် ကစားမည့် ဘန်လေ-ဝက်ဖို့ဒ်၊ ဒီဇင်ဘာ ၁၆ ရက်တွင်ကစားမည့် လက်စတာ-စပါး၊ ပွဲစဉ် ၁၈ အဖြစ် ဒီဇင်ဘာ ၁၈ ရက်တွင်ကစားမည့် မန်ယူ-ဘရိုက်တန်၊ ဆောက်သမ်တန်-ဘရန့် ဖို့ဒ်၊ ဝက်ဖို့ဒ်-ပဲလေ့စ်၊ ဝက်စ်ဟမ်း-နောဝစ်ချ်၊ ဒီဇင်ဘာ ၁၉ ရက်တွင်ကစားမည့် အဲဗာတန်- လက်စတာပွဲတို့ဖြစ်ကြောင်း သိရသည်။
မန်ယူ၊ လက်စတာစသည့် အသင်းများ မှာ COVID-19 ကူးစက်ခံရသူဦးရေ များနေသလို ချယ်လ်ဆီးအသင်းတွင် လူကာကူ၊ ဗာနာ၊ ဟတ်ဆန်အိုဒွိုင်းလ်၊ လီဗာပူးလ် အသင်းတွင်လည်း ဗန်ဒိုက်၊ ဖာဘင်ညို၊ ကာ တစ်ဂျုံးစ်တို့ Positive တွေ့ရှိသဖြင့် ကြာသ ပတေးနေ့က ကစားသည့် ပွဲစဉ်များကို လွဲ ချော်ခဲ့ရသည်။ လီဗာပူးလ်အသင်းနည်းပြ ယာဂန်ကလော့ပ်ကမူ ပြိုင်ပွဲရပ်တန့်ခြင်းမှာ အကျိုးမရှိသော်လည်း အဖြေမရှိသေးကြောင်း သုံးသပ်ပြောကြားခဲ့သည်။
“လိဂ်ပြိုင်ပွဲကို ရပ်တန့်လိုက်တာက မှန်ကန်တဲ့အရာတော့ မဟုတ်ပါဘူး။ ဒါပေမဲ့ ကျွန်တော်တို့အနေနဲ့ ပွဲစဉ်ဇယားတွေနဲ့ ပိုပြီး လိုက်လျောညီထွေရှိဖို့ လိုပါတယ်။ စမ်းသပ်မှု တွေအရ ဘောလုံးက ချမှတ်ထားတဲ့စည်းမျဉ်းတွေကို ကောင်းကောင်းလိုက်နာနိုင်တာ တွေ့ရပါတယ်။ ဒါပေမဲ့ ဒီအချိန်ကတော့ တကယ်ခက်ခဲတဲ့ အခိုက်အတန့်ပါ” ဟု ကလော့ပ်က ပြောကြားခဲ့သည်။
