Black Lives Matter လှုပ်ရှားမှုများအား မည်သည့်အချိန်အထိ ပြုလုပ်မည်ဆိုသည်ကို ပရီးမီးယားလိဂ် ဆွေးနွေးမည်

ပရီးမီးယားလိဂ်တာဝန်ရှိသူများသည် ကလပ်အသင်းများမှ အသင်းခေါင်းဆောင်များနှင့်တွေ့ဆုံပြီး Black Lives Matter လှုပ်ရှားမှုများအား မည်သည့်အချိန်အထိ ပြုလုပ်မည်ဆိုသည်ကို ဆွေးနွေးသွားမည်ဖြစ်ကြောင်း သိရှိရသည်။

ပြီးခဲ့သည့် ၂၀၁၉-၂၀ ဘောလုံးရာသီ ပရီးမီးယားလိဂ်ပွဲစဉ်များတွင် လူဖြူ/လူမည်း ခွဲခြားခြင်းကို ဆန့်ကျင်သောအနေဖြင့် Black Lives Matter လှုပ်ရှားမှုများကို ပရီးမီးယားလိဂ်ကစားသမားများက ပြုလုပ်ခဲ့ကြသည်။

ပွဲမစမီ ကွင်းအတွင်း ဒူးတစ်ဖက်ထောက်ကာ ငြိမ်သက်ခြင်း၊ အကျႌနောက်ကျောတွင် Black Lives Matter စာတန်းကို ရေးသားခြင်း၊ အကျႌများပေါ်တွင် Black Lives Matter လိုဂိုများတပ်ဆင်ခြင်းစသည့် လှုပ်ရှားမှုများကို ပြုလုပ်ခဲ့ကြခြင်းဖြစ်သည်။

သို့သော် နောက်ပိုင်းတွင် ဗြိတိန် Black Lives Matter အဖွဲ့က ၎င်းတို့၏လှုပ်ရှားမှုများတွင် နိုင်ငံရေးအယူအဆ၊ သဘောထားများကို ထည့်သွင်းလာခဲ့ရာ ယင်းလှုပ်ရှားမှုမှာ အငြင်းပွားဖွယ်ရာဖြစ်ခဲ့ရသည်။

ယခုနှစ်ဇူလိုင်လအတွင်းက ပရီးမီးယားလိဂ်အဖွဲ့ချုပ်သည် ဗြိတိန် Black Lives Matter အဖွဲ့၏ နိုင်ငံရေးသဘောထားရေးရာများအား မိမိတို့အားပေးထောက်ခံခြင်းမရှိကြောင်း ကြေညာချက်ထုတ်ပြန်ခဲ့သည်။

ယခု ယင်းလူမျိုးရေးခွဲခြားမှုဆန့်ကျင်ရေးလှုပ်ရှားမှုများအား လာမည့် ၂၀၂၀-၂၁ ရာသီတွင် မည်သည့်အချိန်အထိ၊ မည်ရွေ့မည်မျှ ဆက်လက်လုပ်ဆောင်မည်ဆိုသည်ကို ပရီးမီးယားလိဂ်အသင်းခေါင်းဆောင်များနှင့် ဆွေးနွေး သွားမည်ဖြစ်ကြောင်းသိရှိရသည်။

Black Lives Matter လှုပ်ရှားမှုကို အဓိကဆောင်ရွက်သော အကြံပေးအဖွဲ့တွင်ပါဝင်သူ ဒါရင်းမိုး၊ ဝက်စ်မော်ဂန်၊ အီယန်ရိုက်အစရှိသော ကစားသမား(ဟောင်း)များကမူ လာမည့် ၂၀၂၀-၂၁ ရာသီတွင် ပရီးမီးယားလိဂ်အသင်းများ၏အကျႌများ၌ Black Lives Matter အမှတ်တံဆိပ်များ ဆက်လက်တပ်ဆင်ပြီး ယင်းလှုပ်ရှားမှုကို ဆက်လက်ပြုလုပ်မည်ဟု မျှော်လင့်ကြောင်း ပြောကြားခဲ့သည်။