ရီးယဲလ်အသင်း၏ ပြင်သစ်တိုက်စစ်မှူး ဘန်ဇီမာက ကမ္ဘာ့အကောင်းဆုံးဘောလုံးသမားဆုဖြစ်သည့် Ballon d’Or ကို ငယ်စဉ်ကတည်းက အိပ်မက်မက်ခဲ့ပြီး ယခုအခါ မိမိနှင့် အလှမ်းမဝေးတော့ဟု ထင်မိကြောင်း ပြောကြားခဲ့သည်။
၂၀၂၁ ခုနှစ်အတွက် Ballon d’Or ဆုပေးပွဲ ကျင်းပရန် နီးကပ်လာသည့်အတွက် မီဒီယာများက ယင်းအတွက် မေးမြန်းမှုများပြုလုပ်ခဲ့ရာ ဘန်ဇီမာက ယင်းကဲ့သို့ ပြောကြားခဲ့ခြင်း ဖြစ်သည်။
ဘန်ဇီမာက ”ကျွန်တော် ကလေးအရွယ် ငယ်ငယ်ကတည်းက Ballon d’Or အကြောင်း အိပ်မက်မက်ခဲ့ပါတယ်။ ကျွန်တော့်ရဲ့ စံပြကစားသမားတွေဖြစ်တဲ့ ရော်နယ်လ်ဒိုရော ဇီဒန်းပါ ရီးယဲလ်အသင်းကို ရောက်ရှိလာပြီးတော့ Ballon d’Or ဆုတွေ ရယူနိုင်ခဲ့ကြပါတယ်။ ဒါဟာ ကျွန်တော် ဒီဆုအကြောင်း တွေးဖြစ်တာတွေထဲက အကြောင်းအရာတစ်ခုပါ။ ဒီနေ့တော့ ဒီဆုနဲ့ ကျွန်တော် အလှမ်းမဝေးတော့ဘူးလို့ ထင်မိပါတယ်”ဟု ပြောကြားခဲ့သည်။
ဘန်ဇီမာသည် ယခုနောက်ပိုင်း၌ ရီးယဲလ်အသင်းကို ပိုမိုဦးဆောင်နိုင်စွမ်း ရှိလာခဲ့သလို၊ ပြင်သစ်လက်ရွေးစင်အသင်းတွင်လည်း ပြန်လည်ရွေးချယ်ခြင်းခံခဲ့ရသည်။
လက်ရွေးစင်အသင်းတွင်ရော ကလပ်အသင်းတွင်ပါ ခြေစွမ်းပြနေသူဖြစ်ပြီး စက်တင်ဘာလအတွက် လာလီဂါအကောင်းဆုံးကစားသမားဆုကိုလည်း ရရှိခဲ့သည်။
(၉)ဂိုးသွင်း၊ (၇)ဂိုးဖန်တီးပေးထားသည့် ၎င်း၏ စွမ်းဆောင်ရည်မှာ လက်ရှိ တိုက်စစ်ကစားသမားများထဲတွင် အကောင်းဆုံးဖြစ်နေကြောင်းလည်း သိရသည်။
