Ballon d’Or ဆုအတွက် စည်းမျဉ်းအချို့ အပြောင်းအလဲပြုလုပ်မည်ဟု ပြင်သစ်ဘောလုံးမဂ္ဂဇင်း ကြေညာ

ဘောလုံးလောက၏ဂုဏ်သိက္ခာကြီးမားသည့် ထူးချွန်ဆုတစ်ခုဖြစ်သော Ballon d’Or ဆုကို ၂၀၂၂ ခုနှစ်မှစတင်ကာ စည်းမျဉ်းအချို့ အပြောင်းအလဲပြုလုပ်မည်ဖြစ်ကြောင်း ပြင်သစ်ဘောလုံးမဂ္ဂဇင်းက သောကြာနေ့တွင် ထုတ်ပြန်ကြေညာခဲ့သည်။

ပြင်သစ်ဘောလုံးမဂ္ဂဇင်းအနေဖြင့် Ballon d’Or ဆုကို ၁၉၅၆ ခုနှစ်ကတည်းက စတင်ချီးမြှင့်ခဲ့ခြင်းဖြစ်ပြီး COVID-19 ရောဂါဖြစ်ပွားမှုကြောင့် ၂၀၂၀ မှလွဲ၍ ကျန်နှစ်များအားလုံး နှစ်စဉ်ချီးမြှင့်ခဲ့သည်။

ယခုနှစ်မှစတင်ကာ Ballon d’Or ဆုအတွက် စည်းမျဉ်းလေးခု အပြောင်းအလဲပြုလုပ်မည်ဖြစ်ကြောင်း ပြင်သစ်ဘောလုံးမဂ္ဂဇင်း အယ်ဒီတာချုပ်ဖြစ်သူ ပါစကယ်ဖာရီက L’ Equipe သတင်းစာသို့ ပြောကြားခဲ့သည်။

ယခင်က Ballon d’Or ဆုကို ပြက္ခဒိန်တစ်နှစ်အတွင်း စွမ်းဆောင်ရည်အပေါ်မူတည်၍ ချီးမြှင့်ခဲ့သော်လည်း ယခုနှစ်မှစတင်ကာ ဥရောပဘောလုံးရာသီတစ်ခုအတွက် ပြောင်းလဲချီးမြှင့်မည်ဖြစ်သည်။

ယင်းကဲ့သို့ပြောင်းလဲခြင်းမှာ နောက်ဆုံးပေးအပ်ခဲ့သည့် ၂၀၂၁ အကောင်းဆုံးဆုကို လက်ရှိ PSG အသင်းမှ မက်ဆီက ဘိုင်ယန်တိုက်စစ်မှူး လီဝန်ဒေါစကီးကိုကျော်၍ ရရှိခဲ့ခြင်းအတွက် ဝေဖန်မှုများစွာ ထွက်ပေါ်ခဲ့ခြင်းကြောင့် ဖြစ်နိုင်ကြောင်း သုံးသပ်မှုများရှိနေသည်။

လီဝန်ဒေါစကီးသည် ၂၀၂၀-၂၁ ရာသီတွင် ဘွန်ဒစ်လီဂါစံချိန်တင် (၄၁)ဂိုးအထိ သွင်းယူခဲ့ပြီး အမှတ်ပေးချန်ပီယံဆုကို (၉)နှစ်ဆက် ဆွတ်ခူးနိုင်ခဲ့သည်။

သို့သော် အာဂျင်တီးနားအသင်းနှင့် ကိုပါအမေရိကပြိုင်ပွဲတွင် ဗိုလ်စွဲပြီး မက်ဆီက Ballon d’Or ဆုကို (၇)ကြိမ်မြောက် ရရှိခဲ့ခြင်းအတွက် ဝေဖန်မှုများ ထွက်ပေါ်ခဲ့ခြင်းဖြစ်သည်။