စပါးနည်းပြဟောင်း ပိုချက်တီနိုက Amazon က ရိုက်ကူးခဲ့သည့် စပါးအသင်းအကြောင်း မှတ်တမ်းရုပ်ရှင် All or Nothing တွင် မိမိနှင့် နည်း ပြအဖွဲ့ဝင်ဟောင်းများ၏ ရုပ်သံပါဝင်ချိန် (၂၅)မိနစ်သာ ရှိခဲ့ခြင်းအပေါ် ဝေဖန်ပြောကြားခဲ့ကြောင်း သိရသည်။
All or Nothing မှတ်တမ်းရုပ်ရှင်သည် အပိုင်း(၉)ပိုင်းအထိ ပါဝင်ပြီး စပါးအသင်း၏ Behind The Scenes မြင်ကွင်းများကို ရိုက်ကူးထားခြင်းဖြစ်သည်။
စပါးအသင်းအား (၅)နှစ်ခွဲကြာ ကိုင်တွယ်ကာ လက်ရှိအနေအထားသို့ ရောက်အောင် ထုဆစ်ပေးခဲ့သည့် ပိုချက်တီနိုသည် သူနှင့် သူ၏နည်းပြအဖွဲ့ဝင်များ၏ ပါဝင်ချိန်နည်းပါးခြင်းအပေါ် အားမလိုအားမရဖြစ်ခဲ့ခြင်းဖြစ်သည်။
ပိုချက်တီနိုက “ကျွန်တော်နဲ့ ဂျေးဆုစ်တို့က ဒီရုပ်ရှင်ကို (၂၅)မိနစ်ပဲ ကြည့်ခဲ့ပါတယ်။ ကျွန်တော်တို့ ပါတဲ့ အပိုင်းကိုပဲပေါ့။ ရိုးရိုးသားသားပြောရရင် ဒါက မှန်ပါတယ်။ ဂျေးဆုစ်၊ တိုနီ၊ မီဂွယ်လ်၊ ဆက်ဘက်စတီယာနို(သူ၏နည်းပြအဖွဲ့ဝင်များ)တို့နဲ့ မော်ရစ်စီယိုတို့ အဲဒီမှာ မပါတာ အိုကေပါတယ်။ ကျွန်တော်တို့ ဒီအသင်းမှာ (၅)နှစ်ခွဲကြာအောင် ရှိနေခဲ့ပြီး ဗီဒီယိုထဲမှာ ပါတော့ (၂၅)မိနစ်ပဲ ပါတယ်။ ကျွန်တော် နားလည်နိုင်ပါတယ်။ ဒီမှတ်တမ်းရုပ်ရှင်က အသင်းကို ပုံရိပ်ကောင်းဆီ ပို့ပေးရတာကိုး။ စိတ်မကောင်းဖြစ်တာက ဂျေးဆုစ်(လက်ထောက်နည်းပြ)အတွက်ပါ။ သူက တစ်ခန်းပဲ ပါပါတယ်။ သူက စူပါမန်းလို အလုပ်လုပ်တဲ့သူ၊ မနက်မှာ (၃)နာရီ၊ နေ့လယ်မှာ (၃)နာရီ၊ ညမှာ (၃)နာရီနဲ့ လပေါင်းများစွာ ညှိနှိုင်းဆောင်ရွက်ခဲ့သူပါ”ဟု ပြောကြားခဲ့သည်။
