မြန်မာ့လက်ရွေးစင်အသင်းသည် လက်ရှိဝင်ရောက်ယှဉ်ပြိုင်နေသည့် ၂၀၂၂ ကမ္ဘာ့ဖလားနှင့် ၂၀၂၃ အာရှဖလားခြေစစ်ပွဲ ဒုတိယအဆင့်အုပ်စုလက်ကျန်ပွဲများကို ဆက်လက်မယှဉ်ပြိုင်ဘဲ နုတ်ထွက်ခဲ့ပါက ဒဏ်ကြေးချမှတ်ခံရမည့်အပြင် လာမည့်ကမ္ဘာ့ဖလားခြေစစ်ပွဲဝင်ခွင့် ပိတ်ပင်ခံရနိုင်ကြောင်း မြန်မာနိုုင်ငံဘောလုံးအဖွဲ့ချုပ် (MFF) တာဝန်ရှိသူတစ်ဦးက ပြောကြားခဲ့သည်။
ကမ္ဘာ့ဘောလုံးအဖွဲ့ချုပ် (ဖီဖာ)သည် ကမ္ဘာ့ဖလား ခြေစစ်ပွဲကျင်းပသည့်စည်းမျဉ်းအတိုင်း နုတ်ထွက်သည့် အသင်းများကို ဒဏ်ကြေးနှင့် အခြားပြစ်ဒဏ်များချမှတ်ရန် သတ်မှတ်ထားခြင်းဖြစ်သည်။ မြန်မာ့လက်ရွေးစင် အသင်းသည် ၂၀၂၂ ကမ္ဘာ့ဖလားခြေစစ်ပွဲ ဒုတိယအဆင့် အုပ်စုလက်ကျန်(၃)ပွဲကစားရန် ကျန်ရှိနေပြီး လက်ရှိ ဖြစ်ပေါ်နေသည့် နိုင်ငံရေးအခြေအနေများကြောင့် လက် ကျန်ပွဲများမယှဉ်ပြိုင်ရန် အများစုက လိုလားနေသော်လည်း နုတ်ထွက်ခဲ့ပါက ဒဏ်ကြေးအပြင် နောက်ဆက်တွဲအရေးယူမှုများနှင့် ရင်ဆိုင်ရမည့်အနေအထားရှိနေခြင်းဖြစ်သည်။
မြန်မာ့လက်ရွေးစင်အသင်းသည် ကမ္ဘာ့ဖလားခြေစစ်ပွဲမှ နုတ်ထွက်ခဲ့ပါက ဒဏ်ကြေးဆွစ်ဖရန့် (၄)သောင်း ပေးဆောင်ရမည့်အပြင် ကစားရမည့်ပွဲရလဒ်များ ပယ်ဖျက်ခံရခြင်း၊ ထပ်မံယှဉ်ပြိုင်ရမည့် ၂၀၂၃ အာရှဖလား တတိယအဆင့်ခြေစစ်ပွဲ ယှဉ်ပြိုင်ခွင့်များနှင့် စတင်ရင်ဆိုင်ရမည်ဖြစ်သည်။ ထို့ပြင် လာမည့် ကမ္ဘာ့ဖလားခြေစစ်ပွဲဝင်ခွင့် အပေါ် သက်ရောက်မှုရှိနိုင်ခြင်းနှင့် ဖီဖာကပေးအပ်နေသည့် ထောက်ပံ့ကြေးရရှိမည့်အခြေအနေများလည်း ဆုံးရှုံးဖွယ်ရှိ နေကြောင်း သိရသည်။
“ကမ္ဘာ့ဖလားခြေစစ်ပွဲ လက်ကျန်ပွဲတွေမယှဉ်ပြိုင်ဘူးဆိုရင် အရင်ဆုံးဒဏ်ကြေး ဆွစ်ဖရန့် (၄) သောင်းပေးဆောင်ရမှာဖြစ်ပြီး ကန်ပြီးသားပွဲရလဒ်တွေလည်း ပယ်ဖျက်ခံရမှာဖြစ်ပါတယ်။ ဒါ့အပြင် ၂၀၂၂ ကမ္ဘာ့ ဖလားခြေစစ်ပွဲနဲ့ အတူကျင်းပနေတဲ့ ၂၀၂၃ အာရှဖလားခြေစစ်ပွဲ တတိယအဆင့်ကိုလည်း ယှဉ်ပြိုင်ရတော့မှာမဟုတ်ပါဘူး။ ပွဲရလဒ်တွေပယ်ဖျက်ခံရတဲ့အပြင် ပွဲတွေလည်း ထပ်ကစားရတော့မှာမဟုတ်တဲ့အတွက် ကမ္ဘာ့အဆင့် သတ်မှတ်ချက်မှာလည်း ကျဆင်းသွားနိုင်ပါတယ်။ ဒါက လတ်တလော အရေးယူခံရနိုင်တာတွေဖြစ်ပြီး နောက်ဆက်တွဲအရေးယူမှု တွေလည်းရှိနိုင်ပါတယ်။ လာမယ့်ကမ္ဘာ့ဖလား ခြေစစ်ပွဲ ဝင်ခွင့်ပိတ်ပင်ခံရနိုင်သလို၊ တကယ်လို့ဝင်ခွင့်ရမယ်ဆိုရင်တောင် ခြေစစ်ပွဲကို ပထမဆုံးအဆင့်ကနေ ဝင်ရောက်ယှဉ်ပြိုင်ရမှာဖြစ်ပါတယ်။ ပြီးတော့ ဖီဖာကနေ ထောက်ပံ့နေတာတွေလည်း ဆုံးရှုံးရမယ့်အနေအထားရှိပါတယ်။ ၂၀၀၂ ကမ္ဘာ့ဖလားခြေစစ်ပွဲတုန်းကလည်း နုတ်ထွက်ခဲ့လို့ နောက်ပြိုင်ပွဲဖြစ်တဲ့ ၂၀၀၆ ကမ္ဘာ့ဖလားခြေစစ်ပွဲ ယှဉ်ပြိုင်ခွင့်ပိတ်ပင်ခံရဖူးပါတယ်”ဟု မြန်မာနိုင်ငံဘောလုံးအဖွဲ့ချုပ် (MFF) တာဝန်ရှိသူတစ်ဦးက ပြောကြားခဲ့သည်။
မြန်မာ့လက်ရွေးစင်အသင်းသည် ၂၀၂၂ ကမ္ဘာ့ဖလားနှင့် ၂၀၂၃ အာရှ ဖလားခြေစစ်ပွဲ ဒုတိယအဆင့်အုပ်စု လက်ကျန်ပွဲ(၃)ပွဲကစားရန် ကျန်ရှိနေပြီး မေ(၂၈) ရက်တွင် ဂျပန်၊ ဇွန် (၁၁)ရက်တွင် ကာဂျစ္စတန်၊ ဇွန် (၁၅)ရက်တွင် တာဂျစ်ကစ္စတန်တို့နှင့် ယှဉ်ပြိုင်ရမည်ဖြစ်သည်။ ကမ္ဘာ့ဖလားခြေစစ်ပွဲ (အာရှဇုန်) ဒုတိယအဆင့်အုပ်စု ပွဲများမှာ ကိုရိုနာဗိုင်းရပ်စ်အခြေအနေကြောင့် နောက်ဆုတ်ထားရခြင်းဖြစ်ပြီး မြန်မာအသင်းပါဝင်သည့် အုပ်စု (F) လက်ကျန်ပွဲများကို ဂျပန်နိုင်ငံ၌ ကျင်းပသွား မည်ဖြစ်သည်။ ယင်းအုပ်စုတွင် မြန်မာအသင်းက (၅)ပွဲကစား၊ (၂)ပွဲနိုင်၊ (၃)ပွဲရှုံး၊ (၆) မှတ်ဖြင့် အဆင့်(၄)နေရာတွင် ရပ်တည်နေသည်။
