ရီးယဲလ်အသင်းဥက္ကဋ္ဌဟောင်း ကယ်လ်ဒါရွန်က ဥရောပစူပါလိဂ်ပြိုင်ပွဲ ပြိုလဲခြင်းမှာ လက်ရှိရီးယဲလ်အသင်းဥက္ကဋ္ဌဖြစ်သူ ပီရက်ဇ်အတွက် အရှက်ရစရာဖြစ်ပြီး အသင်းတွင် ၎င်း၏ပုံရိပ်ကို ဆိုးရွားစွာထိခိုက်စေသည်ဟု ပြောကြားခဲ့သည်။
ရီးယဲလ်အသင်းအပါအဝင် ဥရောပထိပ်သီး (၁၂)သင်းသည် ဥရောပဘောလုံးအဖွဲ့ချုပ်(UEFA) ကိုဆန့်ကျင်ကာ ဥရောပစူပါလိဂ်ပြိုင်ပွဲ ကျင်းပရန်အဆိုပြုချက်ကို ဧပြီလ (၁၈)ရက်တွင် ထုတ်ပြန်ခဲ့သည်။
ယင်းနောက် အဆိုပါပြိုင်ပွဲ၏ ပထမဆုံးဥက္ကဋ္ဌအဖြစ် ရီးယဲလ်အသင်းဥက္ကဋ္ဌ ပီရက်ဇ်ကို ခန့်အပ်ကြောင်း ကြေညာခဲ့သည်။
သို့သော် ဥရောပထိပ်တန်းအသင်းများသာ ယှဉ်ပြိုင်ခွင့်ရှိသည့် ဥရောပစူပါလိဂ်ပြိုင်ပွဲကို FIFA၊ UEFA အပါအဝင် ဘောလုံးအလွှာအသီးသီးမှ ဆန့်ကျင်ကန့်ကွက်ခဲ့ကြသည်။
ထို့ကြောင့် ဥရောပစူပါလိဂ်တွင်ပါဝင်သည့် ပရီးမီးယားလိဂ်ထိပ်သီး (၆)သင်းဖြစ်သည့် မန်ယူ၊ လီဗာပူးလ်၊ အာဆင်နယ်၊ ချယ်လ်ဆီး၊ မန်စီးတီး၊ စပါးအသင်းတို့သည် ယင်းပြိုင်ပွဲမှနုတ်ထွက်ကြောင်း ဧပြီလ (၂၀)ရက်တွင် ထုတ်ပြန်ကြေညာခဲ့ပြီး စီးရီးအေကလပ်များဖြစ်သည့် အေစီမီလန်နှင့် အင်တာမီလန်တို့အပြင် လာလီဂါထိပ်သီး အက်သလက်တီကိုအသင်းတို့ကလည်း ယင်းပြိုင်ပွဲတွင် ပါဝင်တော့မည်မဟုတ်ဟု ဧပြီလ (၂၁)ရက်တွင် ကြေညာချက် ထုတ်ပြန်ခဲ့သည်။
ထို့ကြောင့် ဥရောပစူပါလိဂ်ပြိုင်ပွဲအား ကျင်းပရန် မဖြစ်နိုင်တော့ဟု အဆိုပါပြိုင်ပွဲ၏ ဒု-ဥက္ကဋ္ဌအဖြစ်ဆောင်ရွက်နေသည့် ဂျူဗင်တပ်စ်ဥက္ကဋ္ဌ အက်ဂ်နယ်လီက ဝန်ခံခဲ့သည်။
ယင်းကဲ့သို့ ဥရောပစူပါလိဂ်ပြိုင်ပွဲ ပြိုလဲခြင်းမှာ ပီရက်ဇ်အတွက် အလွန်ရှက်စရာကောင်းကြောင်း ကယ်လ်ဒါရွန်က ဆိုခဲ့ခြင်းဖြစ်သည်။
”ဥရောပစူပါလိဂ်ပြိုင်ပွဲ ပြိုလဲသွားတာက ပီရက်ဇ်အတွက် အရမ်းရှက်စရာကောင်းတယ်လို့ ကျွန်တော် ထင်ပါတယ်။ ပီရက်ဇ်ရဲ့လုပ်ရပ်တွေက မှားနေပါတယ်။ သူက ဘောလုံးလောကကို ကယ်တင်မယ်ဆိုပြီး ပြောခဲ့သေးတာပါ။ ဒါပေမဲ့ ပီရက်ဇ်က အသင်းအဖွဲ့ဝင်တွေနဲ့မတိုင်ပင်ဘဲ သူ လုပ်ချင်သလို လုပ်ခဲ့တာပါ။ ရီးယဲလ်အသင်းက အသင်းအဖွဲ့ဝင်တွေနဲ့ တည်ဆောက်ထားတဲ့အသင်းပါ။ သူ လုပ်ချင်သလို လုပ်လို့မရပါဘူး။ အခုအချိန်မှာတော့ သူ့ရဲ့ ပုံရိပ်ဟာ ဆိုးဆိုးရွားရွားကို ထိခိုက်သွားပါပြီ”ဟု ကယ်လ်ဒါရွန်က ပြောကြားခဲ့သည်။
