ဒိန်းမတ်နိုင်ငံတွင် လက်ခံကျင်းပမည့် ယူရို-၂၀၂၀ ပွဲစဉ်များကို ပရိသတ်များ ကြည့်ရှုခွင့်ရမည်ဖြစ်ကြောင်း သိရသည်။
ဥရောပဘောလုံးအဖွဲ့ချုပ်(UEFA)သည် ကိုရိုနာဗိုင်းရပ်စ်ကပ်ဘေးကြောင့် တစ်နှစ်ရွှေ့ဆိုင်းထားရသည့် ယူရို-၂၀၂၀ ပြိုင်ပွဲကို ဇွန်လ (၁၁)ရက်မှ ဇူလိုင်လ (၁၁)ရက်အထိ ဥရောပနိုင်ငံ (၁၂)နိုင်ငံတွင် ကျင်းပမည်ဖြစ်သည်။
သို့သော် ကိုရိုနာဗိုင်းရပ်စ်မှာ လက်ရှိအချိန်အထိ ရှိနေသေးသည့်အတွက် ဥရောပနိုင်ငံ တော်တော်များများတွင် ဘောလုံးပွဲစဉ်များကို ကွင်းပိတ်ကစားနေရဆဲဖြစ်သည်။
သို့သော် ယူရို-၂၀၂၀ ပြိုင်ပွဲ၏ ပွဲစဉ်(၄)ပွဲ လက်ခံကျင်းပသွားမည့် ဒိန်းမတ်နိုင်ငံ၏ မြို့တော် ကိုပင်ဟေဂင်မြို့တွင် အနည်းဆုံးပရိသတ်(၁၁၀၀၀)ကို ဝင်ရောက်ကြည့်ရှုခွင့်ပြုမည်ဟု ဒိန်းမတ်အစိုးရက အတည်ပြုခဲ့ခြင်းဖြစ်သည်။
UEFA သည် ယူရို-၂၀၂၀ ပြိုင်ပွဲ လက်ခံကျင်းပမည့် အိမ်ရှင်နိုင်ငံ (၁၂)နိုင်ငံအား ပရိသတ်များ ဝင်ရောက်ကြည့်ရှုခွင့်ပေးနိုင်မည့် အခြေအနေနှင့်ပတ်သက်၍ ဧပြီလ(၇)ရက် နောက်ဆုံးထား၍ အကြောင်းပြန်ရန် ညွှန်ကြားထားကြောင်းလည်း သိရသည်။
