နိုင်ငံတကာဘောလုံးသမိုင်းနှင့် စာရင်းအင်းပြုစုရေးအဖွဲ့အစည်း (IFFHS)၏ ထုတ်ပြန်ချက်အရ ဘာစီလိုနာအသင်းသည် ပြီးခဲ့သည့်ဆယ်စုနှစ်အတွင်း ကမ္ဘာ့အကောင်းဆုံးကလပ်အသင်းအဖြစ် ရပ်တည်နိုင်ခဲ့ကြောင်း သိရှိရသည်။
IFFHS သည် ပြီးခဲ့သည့်ဆယ်စုနှစ်အတွင်း ကမ္ဘာ့အကောင်းဆုံးအသင်းများစာရင်းကို ထုတ်ပြန်ရာတွင် ၂၀၁၁ ခုနှစ်မှ ၂၀၂၀ ခုနှစ်အတွင်း ဥရောပအခြေစိုက်အသင်းများ၏ စွမ်းဆောင်မှုများကို အခြေခံတွက်ချက်ခဲ့ပြီး ဘာစီလိုနာအသင်းက (၂၈၇၇)မှတ်ဖြင့် အဆင့် (၁)နေရာတွင် ရပ်တည်ခဲ့ခြင်းဖြစ်သည်။
ဒုတိယနေရာတွင် ဘာစီလိုနာ၏ မဟာပြိုင်ဘက် ရီးယဲလ်မက်ဒရစ်အသင်းက (၂၇၈၂)မှတ်ဖြင့် ရပ်တည်နေပြီး ဘာစီလိုနာအသင်းနှင့် (၉၅)မှတ်သာ ကွာဟသည်။
ဘာစီလိုနာအသင်းသည် ပြီးခဲ့သည့်ဆယ်စုနှစ်အတွင်း ချန်ပီယံလိဂ်ဖလား (၂)ကြိမ်၊ လာလီဂါချန်ပီယံဆု (၆)ကြိမ်အပါအဝင် ဆုဖလားပေါင်း (၂၂)လုံးအထိ ရယူနိုင်ခဲ့သည်။
ထို့ကြောင့် ဘာစီလိုနာအသင်းသည် ပြီးခဲ့သည့်ဆယ်စုနှစ်အတွင်း ချန်ပီယံလိဂ်ဖလားကို (၄)ကြိမ်အထိ ရယူနိုင်ခဲ့သည့် ရီးယဲလ်အသင်းကို (၉၅) မှတ်အသာရကာ ကမ္ဘာ့အကောင်းဆုံးကလပ်အသင်းအဖြစ် ရပ်တည်နိုင်ခဲ့ခြင်းဖြစ်သည်။
တတိယနေရာတွင်မူ ပြီးခဲ့သည့် ၂၀၁၉-၂၀ ရာသီတွင် ချန်ပီယံလိဂ်၊ ဘွန်ဒစ်လီဂါနှင့် ဂျာမန်ဖလားတို့ကို ရယူနိုင်ခဲ့သည့် ဘိုင်ယန်မြူးနစ်အသင်းက (၂၅၉၄)မှတ်ဖြင့် ရပ်တည်ခဲ့ပြီး စတုတ္ထနေရာတွင် ပြင်သစ်ပြည်တွင်းပြိုင်ပွဲများကို လွှမ်းမိုးထားသည့် PSG အသင်းက (၂၃၅၇)မှတ်ဖြင့် ရပ်တည်နေသည်။
PSG အသင်းနောက်တွင် အက်သလက်တီကို(၂၃၀၂ မှတ်)၊ ဂျူဗင်တပ်စ် (၂၂၇၂ မှတ်)တို့ အဆင့် (၅)နှင့် (၆)နေရာတွင်များတွင် အစဉ်လိုက်ရပ်တည်နေပြီး အဆင့် (၇)မှ အဆင့် (၁၀)အတွင်းတွင်မူ အင်္ဂလိပ်ကလပ်များဖြစ်သည့် ချယ်လ်ဆီး၊ မန်စီးတီး၊ မန်ယူနှင့် အာဆင်နယ်တို့က အစဉ်လိုက် ရပ်တည်နေသည်။
ဘာစီလိုနာအသင်းသည် IFFHS က ထုတ်ပြန်ခဲ့သည့် ၂၀၀၁ ခုနှစ် မှ ၂၀၁၀ ခုနှစ်အထိ ကမ္ဘာ့အကောင်းဆုံးကလပ်အသင်းစာရင်းတွင်လည်း အဆင့် (၁)နေရာတွင် ရပ်တည်နိုင်ခဲ့ရာ (၂၁)ရာစုအတွင်း အကောင်းဆုံးအသင်းအဖြစ်ပါ မှတ်တမ်းဝင်ခဲ့သည်။
