ယခုနွေရာသီ မန်ယူအသင်း၏ အပြောင်းအရွှေ့စီမံကိန်းမှာ ကွင်းလယ်လူ ပေါ့ဘာ၏ အနာဂတ်အပေါ်တွင် မူတည်နေကြောင်း ဗြိတိန်သတင်းစာ Daily Mail က ဖော်ပြခဲ့သည်။ မန်ယူအသင်းအနေဖြင့် နွေရာသီအပြောင်းအရွှေ့ကာလအတွင်း ဒေါ့မွန်အသင်းမှ အင်္ဂလန်တောင်ပံကစားသမား ဆန်ချို၊ ဗီလာအသင်းမှ အင်္ဂလန်ကွင်းလယ်လူ ဂရီးလစ်ရှ်တို့ကို ခေါ်ယူရန် ပစ်မှတ်ထားလျက်ရှိသည်။
၎င်းကစားသမားများကို ခေါ်ယူရန်အတွက် မန်ယူအသင်းမှာ ပြောင်းရွှေ့ကြေးငွေ အမြောက်အမြားသုံးစွဲရမည်ဖြစ်သည်။ မန်ယူအသင်းသည် အနာဂတ်လှုပ်ခတ်နေသော ပေါ့ဘာအား ရောင်းချဖြစ်ခဲ့ပါက ရရှိမည့်ပြောင်းရွှေ့ကြေးငွေကို ကစားသမားသစ် ခေါ်ယူမှုအတွက် ပြန်လည်အသုံးပြုမည်ဖြစ်ရာ အသင်း၏အပြောင်းအရွှေ့စီမံကိန်းရေးဆွဲမှုမှာ ပေါ့ဘာအား ရောင်းချခြင်းရှိ၊ မရှိအပေါ်တွင် အဓိကမူတည်နေကြောင်း Daily Mail သတင်းစာက ဖော်ပြခဲ့သည်။ ၂၀၁၆ နွေရာသီအပြောင်းအရွှေ့ကာလက ဂျူဗင်တပ်စ်အသင်းမှ ကမ္ဘာ့စံချိန်တင်ပြောင်းရွှေ့ကြေး ပေါင်(၈၉) သန်းဖြင့် ရောက်ရှိလာသော ပေါ့ဘာကို စပိန်ကလပ် ရီးယဲလ်မက်ဒရစ်အသင်းက ခေါ်ယူရန် ပစ်မှတ်ထားနေသလို၊ အသင်းဟောင်း ဂျူဗင်တပ်စ်အသင်းကလည်း ပြန်လည်ခေါ်ယူရန် ဆန္ဒရှိနေသည်ဟု သတင်းများထွက် ပေါ်နေသည်။
ပြီးခဲ့သည့် ၂၀၁၉-၂၀ ရာသီတွင် ပေါ့ဘာသည် ခြေချင်းဝတ်ဒဏ်ရာပြဿနာကြောင့် အသင်း၏ပွဲစဉ်အတော်များများကို လွဲချော်ခဲ့ပြီး ရာသီကုန်ခါနီးမှသာ အသင်းတွင် ပြန်လည်ပါဝင်ကစားနိုင်ခဲ့သည်။ ပေါ့ဘာ အနားယူနေစဉ်ကာလအတွင်း သူ၏အနာဂတ်နှင့်ပတ်သက်သောသတင်းများ အဆက်မပြတ်ထွက်ပေါ်ခဲ့ပြီး သူ၏အေးဂျင့်ဖြစ်သူ ရိုင်အိုလာနှင့် မန်ယူအသင်းတာဝန်ရှိသူများအကြား ဆက်ဆံရေးမှာလည်း အဆင်မပြေမှုများ ဖြစ်ပေါ် ခဲ့သည်။ စပိန်ကလပ် ရီးယဲလ်မက်ဒရစ်အသင်းနည်းပြ ဇီဒန်းသည် အသက်(၃၀)ကျော်အသက်အပိုင်းအခြားကို ရောက်ရှိလာပြီဖြစ်သော ကွင်းလယ်လူ မိုဒရစ် (၃၄ နှစ်) နှင့် တိုနီကရို့စ် (၃၀ နှစ်)တို့၏နေရာများတွင် ပေါ့ဘာကို အစားထိုးရန် ဆန္ဒရှိနေပြီး ပြီးခဲ့သည့်အပြောင်းအရွှေ့ကာလများတွင် ခေါ်ယူရန် ကြိုးပမ်းမှုများပြုလုပ်ခဲ့ကြောင်း ဗြိတိန်မီဒီယာများက ဖော်ပြခဲ့ကြသည်။
ပြီးခဲ့သည့် ၂၀၁၉ ခုနှစ်အတွင်း ပေါ့ဘာသည် စပိန်မြေသို့ပြောင်းရွှေ့ကစားရန် ဆန္ဒရှိနေကြောင်း ဝန်ခံခဲ့ဖူးသလို၊ ရီးယဲလ်မက်ဒရစ်အသင်းအနေဖြင့် မန်ယူအသင်း တောင်းဆိုသည့်ပြောင်းရွှေ့ကြေး ပေါင်သန်း (၁၅၀)ကို မပေးချေလို၍သာ သူ၏အပြောင်းအရွှေ့မဖြစ်ပေါ်ခဲ့ခြင်းဖြစ်ကြောင်း စပိန်သတင်းစာများက ဖော်ပြခဲ့ကြသည်။ လက်ရှိတွင် ဒေါ့မွန်အသင်းသည် ၎င်းတို့၏ ကစားသမား ဆန်ချိုအတွက် ပြောင်းရွှေ့ကြေးကို ပေါင် (၁၁၅)သန်း မျှော်မှန်းထားသလို၊ အက်စတွန်ဗီလာအ သင်းကလည်း ၎င်းတို့၏အသင်းခေါင်းဆောင် ဂရီးလစ်ရှ်အတွက် ပြောင်းရွှေ့ကြေးကို ပေါင်သန်း(၈၀) သတ်မှတ်ထား၍ ယင်းကစားသမားများ မန်ယူအသင်းသို့ရောက်ရှိလာရန် ပေါ့ဘာအား ရောင်းချရာမှရရှိမည့် ပြောင်းရွှေ့ကြေးငွေက အဓိကကျနေကြောင်း Daily Mail သတင်းစာက ဖော်ပြခဲ့သည်။
