ဘာစီလိုနာအသင်းဥက္ကဋ္ဌ ရွေးကောက်ပွဲတွင် ယခင်ဥက္ကဋ္ဌဟောင်း လာပေါ်တာ အနိုင်ရရှိခဲ့ပြီး မက်ဆီကို ဆက်ထိန်းသွားမည်ဟု ကတိပေး

ဘာစီလိုနာအသင်းဥက္ကဋ္ဌ ရွေးကောက်ပွဲတွင် ဥက္ကဋ္ဌရာထူးကို ဆောင်ရွက်ခဲ့ဖူးသည့် ယိုအန်လာပေါ်တာက အနိုင်ရရှိခဲ့ပြီး အသင်းဥက္ကဋ္ဌအဖြစ် ဒုတိယအကြိမ်မြောက် ဆောင်ရွက်သွားမည်ဖြစ်ကြောင်း သိရှိရသည်။

လာပေါ်တာသည် ဘာစီလိုနာအသင်းနှင့် အနာဂတ်မရေမရာဖြစ်နေသည့် မက်ဆီကို အသင်းတွင် ဆက်ထိန်းနိုင်အောင် ကြိုးစားသွားမည်ဆိုသည့် ကတိကဝတ်ဖြင့် ဝင်ရောက်ယှဉ်ပြိုင်ခဲ့ခြင်းဖြစ်ပြီး ဥက္ကဋ္ဌရွေးကောက်ပွဲတွင် ဆန္ဒမဲအရေအတွက် (၅၄) ရာခိုင်နှုန်းရရှိခဲ့သည်ဟုလည်း သိရှိရသည်။

လာပေါ်တာသည် ဘာစီလိုနာအသင်းဥက္ကဋ္ဌရာထူးကို ၂၀၀၃ ခုနှစ်မှ ၂၀၁၀ ခုနှစ်အထိ ဆောင်ရွက်ခဲ့ဖူးရာ အောင်မြင်မှုများစွာ ရယူနိုင်ခဲ့ပြီး ၎င်း ဥက္ကဋ္ဌရာထူးကို လက်ခံဆောင်ရွက်ခဲ့သည့် ကာလအတွင်း ဂွါဒီယိုလာကို အသင်းနည်းပြအဖြစ် စတင်ခန့်အပ်ခဲ့သူလည်းဖြစ်သည်။

သူသည် ယခုအခါတွင် ပြီးခဲ့သည့်နှစ် အောက်တိုဘာလက ပြဿနာအရှုပ်အထွေးများစွာဖြင့် အသင်းဥက္ကဋ္ဌရာထူးမှ နုတ်ထွက်သွားခဲ့သည့် ဘာတိုမူ၏နေရာတွင် ပြန်လည်အစားထိုးဝင်ရောက်နိုင်ခဲ့ခြင်းလည်းဖြစ်သည်။

လာပေါ်တာနှင့် အပြိုင်ရေပန်းစားခဲ့သည့် ဥက္ကဋ္ဌလောင်း ဗစ်တာဖောင့်က ဆန္ဒမဲအရေအတွက် (၃၀) ရာခိုင်နှုန်းကျော်ဖြင့် မဲအရေအတွက် ဒုတိယအများဆုံး ရရှိခဲ့ပြီး အခြားဥက္ကဋ္ဌလောင်းတစ်ဦးဖြစ်သည့် တိုနီဖရိုင်ဇာက တတိယနေရာတွင် ရပ်တည်နိုင်ခဲ့သည်။

ဘာစီလိုနာအသင်းက ထုတ်ပြန်ကြေညာခဲ့ရာတွင် လာပေါ်တာသည် စုစုပေါင်းဆန္ဒမဲပေးပိုင်းခွင့်ရှိသည့် အဖွဲ့ဝင် (၁၀၉၅၃၁) ဦးအနက် (၅၅၆၁၁) ဦး၏ ထောက်ခံမဲကို ရရှိခဲ့သည်ဟုသိရပြီး၊ စုစုပေါင်း မဲအရေအတွက်၏ (၅၀)ရာခိုင်နှုန်းကို ကျော်လွန်ခဲ့သဖြင့် အခြားပြိုင်ဘက်များကို အပြတ်အသတ်အနိုင်ယူနိုင်ခဲ့ခြင်းလည်းဖြစ်သည်။

လာပေါ်တာသည် ပထမအကြိမ် ဥက္ကဋ္ဌသက်တမ်းကို ဆောင်ရွက်ချိန်က ရော်နယ်လ်ဒင်ဟို၊ အီတူး စသည့် ကစားသမားများကို ခေါ်ယူခဲ့ပြီး သူ ဥက္ကဋ္ဌအဖြစ်ဆောင်ရွက်ခဲ့သည့် ကာလအတွင်း ဘာစီလိုနာအသင်းသည် ချန်ပီယံလိဂ်ဖလား (၂)ကြိမ်၊ လာလီဂါဖလား (၄) ကြိမ်နှင့် ဘုရင့်ဖလား (၁)ကြိမ်ရရှိခဲ့သည်။

မက်ဆီမှာလည်း လာပေါ်တာ၏ ပထမသက်တမ်းအတွင်း ပေါ်ထွက်လာခဲ့သည့် ကြယ်ပွင့်တစ်ဦးဖြစ်ပြီး၊ မက်ဆီသည် ယခု ဥက္ကဋ္ဌရွေးကောက်ပွဲတွင် အခြားဘာစီလိုနာကစားသမားများနှင့်အတူ ဝင်ရောက်ဆန္ဒမဲပေးခဲ့ကြောင်းလည်း သိရှိရသည်။

ဥက္ကဋ္ဌရွေးကောက်ပွဲတွင် အောင်နိုင်ကြောင်း သိရှိရပြီးနောက် အောင်ပွဲခံအခမ်းအနားတွင် လာပေါ်တာက ”အခုတော့ ပါရီကို ချီတက်ပြီး ငါတို့ နောက်တစ်ကြိမ် ပြန်လာနိုင်သေးတယ်ဆိုတာ ပြသရအောင်။ ဥက္ကဋ္ဌ ရွေးကောက်ပွဲမှာ လီယို (မက်ဆီ)လည်း သူ့သားလေးနဲ့အတူ မဲလာပေးတယ်ဆိုတာကို တွေ့လိုက်ရတယ်။ ကျွန်တော့်အတွက်တော့ ဒါဟာ ကျွန်တော် အမြဲတမ်းပြောခဲ့ဖူးသလိုပဲ လီယိုဟာ ဘာစီလိုနာကို ဘယ်လောက်ချစ်သလဲ ဆိုတာကို ပြသလိုက်တာပါပဲ။ ငါတို့အားလုံးဟာ မိသားစုကြီးတစ်ခုပါ။ ဒီအခြေအနေက မက်ဆီကို အသင်းမှာ ဆက်ရှိအောင် ထိန်းထားဖို့အတွက် အကူအညီဖြစ်လိမ့်မယ်လို့ မျှော်လင့်နေပါတယ်”ဟု ပြောကြားခဲ့သည်။

ဘာစီလိုနာအသင်းသည် ဥက္ကဋ္ဌရွေးကောက်ပွဲကို ဇန်နဝါရီလကတည်းက ပြုလုပ်ရမည်ဖြစ်သော်လည်း ကိုဗစ်-၁၉ ကြောင့် ယခုမှ ကျင်းပနိုင်ခြင်းလည်းဖြစ်သည်။