ရီးယဲလ်မက်ဒရစ်အသင်းသည် မြို့ခံပြိုင်ဘက် အက်သလက်တီကိုမက်ဒရစ်အသင်းအား ကျော်ဖြတ်ကာ ယခုရာသီ လာလီဂါချန်ပီယံဆုကို ရရှိမည်ဟု ပရိသတ်များက မဲပေးရွေးချယ်ခဲ့ကြကြောင်း စပိန်အားကစားသတင်းစာ Marca က ဖော်ပြခဲ့သည်။
အက်သလက်တီကိုအသင်းသည် လာလီဂါနောက်ဆုံး (၄)ပွဲတွင် (၁)ပွဲသာ အနိုင်ရကာ (၂)ပွဲသရေ၊ (၁)ပွဲရှုံး ရလဒ်ထွက်ပေါ်ခဲ့ပြီး အများဆုံး ရနိုင်သည့် (၁၂)မှတ်တွင် (၅)မှတ်သာရရှိခဲ့သည်။
အက်သလက်တီကိုအသင်း ရုန်းကန်နေရချိန်တွင် ရီးယဲလ်အသင်းသည် ရလဒ်များကောင်းမွန်ခဲ့ပြီး လာလီဂါနောက်ဆုံး (၄)ပွဲဆက်တိုက် အနိုင်ရခဲ့သည်။
ထို့ကြောင့် လာလီဂါပွဲစဉ် (၂၄)အပြီးတွင် အဆင့် (၂)နေရာတွင် ရပ်တည်နေသည့် ရီးယဲလ်မက်ဒရစ်(၅၂ မှတ်)နှင့် ပွဲကျန်တစ်ပွဲကစားရန် ကျန်ရှိနေသေးသည့် အဆင့်(၁)နေရာမှ အက်သလက်တီကိုအသင်း (၅၅ မှတ်)တို့အကြား အမှတ်ကွာဟမှုမှာ (၃)မှတ်သာရှိတော့သည်။
လာလီဂါပွဲစဉ် (၂၄)အပြီး Marca က ပြုလုပ်ခဲ့သည့် ယခုရာသီ လာလီဂါပြိုင်ပွဲတွင် မည်သည့်အသင်း ဗိုလ်စွဲမည်နည်းဆိုသည့် စစ်တမ်းတွင် ပရိသတ် (၅၀) ရာခိုင်နှုန်းက ရီးယဲလ်အသင်း ဗိုလ်စွဲလိမ့်မည်ဟု မဲပေးခဲ့ခြင်းဖြစ်သည်။
ဒုတိယနေရာတွင် အက်သလက်တီကိုအသင်းက (၃၄) ရာခိုင်နှုန်းဖြင့်ရှိနေပြီး တတိယနေရာတွင် ဆီဗီလာအသင်းက (၉) ရာခိုင်နှုန်းနှင့် စတုတ္ထနေရာတွင် ဘာစီလိုနာအသင်းက (၇) ရာခိုင်နှုန်းဖြင့် ရပ်တည်နေသည်။ ရီးယဲလ်အသင်းသည် လက်ရှိတွင် ဒဏ်ရာရကစားသမား များပြားနေသော်လည်း ရလဒ်ပိုင်း ပြန်လည်ကောင်းမွန်လာခြင်းကြောင့် ဗိုလ်စွဲရန် ရေပန်းအစားဆုံးဖြစ်လာခြင်းဖြစ်သည်။
