စပိန်ဘုရင့်ဖလား ဆီမီးဖိုင်နယ်တွင်ဆီဗီလာနှင့် ရေပန်းအစားဆုံးဘာစီလိုနာ၊ ဘီလ်ဘာအိုနှင့်လီဗန်တေး တွေ့ဆုံနေ

၂၀၂၀-၂၀၂၁ ရာသီ စပိန်ဘုရင့်ဖလား (Copa del Rey) ပြိုင်ပွဲ ဆီမီးဖိုင်နယ်ပွဲစဉ် များကို မဲနှိုက်ရေးဆွဲထုတ်ပြန်ခဲ့ရာ ဆီဗီလာနှင့် ဗိုလ်စွဲရန် ရေပန်းအစားဆုံး ဘာစီလိုနာ၊ ဘီလ်ဘာအိုနှင့် လီဗန်တေး အသင်းတို့ တွေ့ဆုံနေကြောင်း သိရသည်။

အစောပိုင်းအဆင့်များကို တစ်ကျော့တည်းသာ ယှဉ်ပြိုင်ကစားခဲ့သော်လည်း ဆီမီးဖိုင်နယ်ကို အိမ်ကွင်း၊ အဝေးကွင်းအဖြစ် နှစ်ကျော့ကျင်းပမည်ဖြစ်သည်။ ပထမအကျော့ကို ဆီဗီလာအသင်းနှင့် ဘီလ်ဘာအိုအသင်း တို့ အိမ်ကွင်းလက်ခံကစားရမည်ဖြစ်ပြီး ဖေဖော်ဝါရီ ၁၀ ရက်၊ ၁၁ ရက်နှင့် ဒုတိယအကျော့ကို မတ် ၃ ရက်နှင့် ၄ ရက်တွင် ကျင်းပမည် ဖြစ်သည်။

ယခုပြိုင်ပွဲတွင် အကြိမ် ၃၀ ဗိုလ်စွဲထားသည့် ဘာစီလိုနာအသင်းသည် ၂၀၁၈ ခုနှစ်နောက်ပိုင်း ဗိုလ်လုပွဲသို့ တစ်ကျော့ပြန် တက်ရောက်နိုင်ရန်အပြင် ချန်ပီယံဆုရရှိရန်ပါ ရေပန်းအစားဆုံးဖြစ်နေသော်လည်း ဆီဗီ လာအသင်းနှင့် ပွဲကျပ်ဆုံတွေ့နေခြင်းဖြစ်သည်။

ဘီလ်ဘာအိုအသင်းမှာလည်း ၂၀၂၀ ရာသီတွင် ဗိုလ်လုပွဲရောက်ရှိထားသလို ယခုအဆင့်တွင် လီဗန်တေးအသင်းကို ကျော်ဖြတ်နိုင်ပါက ဗိုလ်လုပွဲသို့ နှစ်ကြိမ်ဆက်တက်ရောက်ခွင့်ရမည်ဖြစ်သည်။

ပထမအကျော့ပွဲစဉ်များ (၁၀/၁၁-၂-၂၁)
ဆီဗီလာ – ဘာစီလိုနာ
ဘီလ်ဘာအို – လီဗန်တေး