ကူဘိုအားအငှားခေါ်ယူနိုင်ရန် ဆီဗီလာအသင်းစီစဉ်နေ

စပိန်လာလီဂါကလပ် ဆီဗီလာအသင်းသည် ရီးယဲလ်မက်ဒရစ်အသင်းမှ ဂျပန်လူငယ်ကွင်းလယ်လူ ကူဘို (၁၉ နှစ်) အား အငှားခေါ်ယူရန်စီစဉ်နေကြောင်းသိရသည်။

ဆီဗီလာအသင်းသည် ၂၀၁၉-၂၀ ဘောလုံးရာသီ စပိန်လာလီဂါပြိုင်ပွဲပြီးဆုံးချိန်တွင် အဆင့် (၄)နေရာတွင်၌ရပ်တည်နိုင်ခဲ့ပြီး ချန်ပီယံလိဂ်ဝင်ခွင့်ရရှိခဲ့သည့်အတွက် အသင်း၏ ကစားသမားအင်အားကို ဖြည့်တင်းရန်ကြိုးပမ်းမှုများ စတင်ပြုလုပ်နေခြင်းလည်းဖြစ်သည်။

ထို့ကြောင့် ဆီဗီလာအသင်းအနေဖြင့် အရည်အသွေးရှိလူငယ်ကစားသမားတစ်ဦးဖြစ်သော ကူဘိုအား အသင်း၏ကွင်းလယ်ပိုင်းအတွက် အားဖြည့်ရန်ကြိုးပမ်းနေခြင်းဖြစ်ပြီး တစ်ရာသီအငှားစာချုပ်ဖြင့်ခေါ်ယူရန် စီစဉ်နေခြင်းဖြစ်သည်။

ရီးယဲလ်မက်ဒရစ်အသင်းအနေဖြင့် အသင်း၏ကစားသမားစုဖွဲ့မှုကြောင့် လူငယ်ကစားသမားများအား နေရာပေးရန်အခက်အခဲရှိသည့်အတွက် အတွေ့အကြုံကောင်းများရစေရန်ရည်ရွယ်ပြီး အငှားစေလွှတ်မှုများကို ထပ်မံပြုလုပ်ရန် ဆန္ဒရှိနေခြင်းဖြစ်သည်။

ထို့ကြောင့် ကူဘိုအားအငှားခေါ်ယူလိုသည့်အသင်းများ များပြားနေသော်လည်း ရီးယဲလ်မက်ဒရစ်အသင်းအနေဖြင့် ချန်ပီယံလိဂ်ဝင်ခွင့်ရထားသည့် ဆီဗီလာအသင်းကိုသာ ဦးစားပေးရွေးချယ်ဖွယ်ရှိကြောင်းလည်း စပိန်မီဒီယာများကဖော်ပြခဲ့ကြသည်။

ဘာစီလိုနာအသင်း၏ လာမာစီယာအကယ်ဒမီကစားသမားဟောင်းဖြစ်သူ ကူဘိုသည် ပြီးခဲ့သည့် ၂၀၁၉ ဇွန်လက၊ တိုကျို FC အသင်းမှ ရီးယဲလ်မက်ဒရစ်အသင်းသို့ (၅)နှစ်စာချုပ်ဖြင့်ပြောင်းရွှေ့လာသူဖြစ်ပြီး ၂၀၁၉-၂၀ ဘောလုံးရာသီတွင် မာယော့ကာအသင်းသို့ အငှားသွားရောက်ကစားခဲ့သူဖြစ်သည်။

ကူဘိုသည် မာယော့ကာအသင်းအတွက် တစ်ရာသီအတွင်းပြိုင်ပွဲစုံ (၃၆)ပွဲကစားကာ (၄)ဂိုးသွင်းယူပေးခဲ့ပြီး ဂိုးဖန်တီးမှု (၅)ကြိမ်ပြုလုပ်ကာခြေစွမ်းပြနိုင်ခဲ့သည်။