ချယ်လ်ဆီးအသင်းနည်းပြသစ်ဖြစ်လာသော ဂျာမန်လူမျိုးနည်းပြ တူဟယ်လ်သည် ချယ်လ်ဆီးအသင်းမှ လူငယ်ကစားသမားများကို နည်းပြဟောင်း လမ်းပတ်ကဲ့သို့ပင် ယုံကြည်မှု ဆက်ထားရှိသွားမည်ဖြစ်ပြီး လာမည့်နွေရာသီတွင် ဒေါ့မွန်အသင်း၏ နော်ဝေလူငယ်တိုက်စစ်မှူး ဟော်လန်း(၂၀ နှစ်)ကို ခေါ်ယူနိုင်ရန် အဓိကကြိုးပမ်းသွားမည်ဖြစ်ကြောင်း ဗြိတိန်သတင်းစာ Daily Mail က ဖော်ပြခဲ့သည်။
ချယ်လ်ဆီးအသင်းသည် ပြီးခဲ့သည့် ဇန်နဝါရီ(၂၆)ရက် (အင်္ဂါနေ့)က တူဟယ်လ်အား နည်းပြသစ်အဖြစ်ခန့်အပ်လိုက်ကြောင်း အတည်ပြုကြေညာခဲ့ပြီး နာရီပိုင်းအကြာ၌ပင် ချယ်လ်ဆီးအသင်းလေ့ကျင့်ရေးကွင်း၌ ကစားသမားများနှင့်အတူ လေ့ကျင့်နေသည့် တူဟယ်လ်၏ ဓာတ်ပုံများ ထွက်ပေါ်လာခဲ့သည်။
တူဟယ်လ်သည် ချယ်လ်ဆီးနည်းပြအဖြစ် ခန့်အပ်ခံရပြီးပြီးချင်း အချိန်ဆိုင်းမနေဘဲ အသင်းကို မြန်မြန်ဆန်ဆန်ကိုင်တွယ်ခဲ့ခြင်းဖြစ်ပြီး သူ၏ပထမဆုံးလေ့ကျင့်ရေးအစီအစဉ် မစတင်မီ သတင်းသမားများနှင့် တွေ့ဆုံခဲ့သည်။
၎င်းက ”ကျွန်တော်နဲ့ ကျွန်တော့်ရဲ့နည်းပြအဖွဲ့ကို ယုံကြည်မှုထားရှိပေးတဲ့အတွက် ချယ်လ်ဆီးအသင်းကို ကျေးဇူးတင်ကြောင်း ပြောလိုပါတယ်။ ဒီအသင်းမှာ ဖရန့်လမ်းပတ် စွမ်းဆောင်ပေးခဲ့တဲ့အရာတွေနဲ့ သူ ထားရှိခဲ့တဲ့ အမွေအနှစ်တွေကို ကျွန်တော်များစွာ တန်ဖိုးထား လေးစားပါတယ်။ ကျွန်တော့်ရဲ့အသင်းသစ်နဲ့အတူ စိတ်လှုပ်ရှားစရာကောင်းတဲ့ လိဂ်ပြိုင်ပွဲမှာ ယှဉ်ပြိုင်ဖို့ ကျွန်တော် ဆန္ဒပြင်းပြနေပါပြီ” ဟု ပြောကြားခဲ့သည်။
ချယ်လ်ဆီးအသင်းတွင် ယခင်နည်းပြ လမ်းပတ်၏လက်ထက်၌ မေဆန်မောင့်၊ ရီးစ်ဂျိမ်းစ်၊ အေဘရာဟမ် အစရှိသော ချယ်လ်ဆီးအကယ်ဒမီထွက်ကစားသမားများမှာ အသင်းတွင် အဓိကကစားသမားများအဖြစ် နေရာရရှိခဲ့ပြီး တူဟယ်လ်အနေဖြင့်လည်း ယင်းလူငယ်ကစားသမားများကို ယုံကြည်မှုထားရှိကာ အသင်း၌နေရာပေးသွားမည်ဖြစ်ကြောင်း သိရှိရသည်။
ချယ်လ်ဆီးအသင်းဘုတ်အဖွဲ့သည် လာမည့်နွေရာသီ၌ အသင်းကို စိတ်ကြိုက်ပြင်ဆင်ရန်အတွက် တူဟယ်လ်အား ခွင့်ပြုချက်ပေးသွားမည်ဖြစ်ရာ တူဟယ်လ်သည် သူ၏အသင်းဟောင်း ဒေါ့မွန်အသင်းမှ နော်ဝေလက်ရွေးစင်တိုက်စစ်မှူး ဟော်လန်းကို ခေါ်ယူနိုင်ရန် အဓိကပစ်မှတ်ထား ကြိုးပမ်းသွားမည်ဖြစ်ကြောင်း သိရသည်။
