ချယ်လ်ဆီးအသင်းနည်းပြရာထူးမှ ထုတ်ပယ်ခံရသည့် ဖရန့်လမ်းပတ်က အသင်းတွင် အချိန်များများမရသည့်အတွက် စိတ်ပျက်မိသည်ဟု သူ၏ Instagram တွင် ရေးသားခဲ့သည်။ လမ်းပတ်သည် ချယ်လ်ဆီးအသင်းကို ၁၈ လကြာ ကိုင်တွယ်ပြီးနောက် ရလဒ်ဆိုးများကြောင့် ဇန်နဝါရီ ၂၅ ရက်က ရာထူးမှထုတ်ပယ်ခံရသည်။
“ချယ်လ်ဆီး အသင်းကို ကိုင်တွယ်ခွင့်ရတာဟာ ဂုဏ်ယူစရာကောင်းတဲ့ အခွင့်အရေးတစ်ရပ်ပါ။ ဒီရာသီမှာ ကလပ်အသင်းကို ရှေ့ဆုံးရောက်အောင်ပို့ဆောင်နိုင်ဖို့ အချိန်မရှိခဲ့တဲ့အတွက် ကျွန်တော် စိတ်ပျက်မိပါတယ်။ အားလုံးကို ကျေးဇူးတင်ပါတယ်” ဟု လမ်းပတ်က ဆိုခဲ့သည်။
ချယ်လ်ဆီးအသင်းကို ၂၀၀၃ ခုနှစ်က ရုရှားဘီလျံနာ အေဘရာမိုဗစ်ချ် ဝယ်ယူသည့် အချိန်မှစတင်ပြီး အသင်း၏နည်းပြထုတ်ပယ်မှုများအတွက် ကုန်ကျငွေပေါင်းမှာ ပေါင် သန်း ၁၂၀ နီးပါးရှိလာပြီဖြစ်ကြောင်း သိရသည်။ ယခု နည်းပြ လမ်းပတ်ကို ရာထူးမှ ထုတ်ပယ်မှုအတွက် ချယ်လ်ဆီးအသင်းအနေဖြင့် ပေါင် ခြောက်သန်းဝန်းကျင် ကုန်ကျနိုင်ကြောင်း သိရသည်။ လမ်းပတ်သည် အသင်းနှင့် ၂၀၂၂ ခုနှစ်အထိ စာချုပ်သက်တမ်း ရှိထားပြီး တစ်နှစ်လစာ ပေါင် လေးသန်းရရှိ နေသူဖြစ်သည်။
အေဘရာမိုဗစ်ချ်လက်ထက်တွင် ချယ်လ်ဆီးအသင်းမှာ ၁၈ နှစ်တာကာ လအတွင်း နည်းပြ ၁၂ ဦးအထိ အသင်းကို ကိုင်တွယ်ခဲ့ပြီး ယင်းထဲမှ ဆာရီတစ်ဦးတည်းသာ ဂျူဗင်တပ်စ်ကိုကိုင်တွယ်ရန် အသင်းမှ နုတ်ထွက်ခဲ့ခြင်းဖြစ်ကာ ကျန်နည်းပြများကို ထုတ်ပယ်မှုအတွက် စာချုပ်လျော်ကြေး ပေါင် ၁၁၀ ဒသမ ၅ သန်း အထိရှိသည်ဟု The Sun သတင်းစာက ဖော်ပြခဲ့သည်။
