နာမည်ကြီး အိုင်ယာလန် MMAကစားသမား ကော်နာမက်ဂရီဂေါ်အနေဖြင့် UFC 257 ပြိုင်ပွဲတွင် အမေရိကန်ကစားသမား ဒပ်စတင်ပိုရီယေးကို ရှုံးနိမ့်ခဲ့သော်လည်း ထိုးကြေးနှင့် အခြားခံစားခွင့်စုစုပေါင်း ပေါင် ၁၈ သန်းကျော်ရရှိမည်ဖြစ်ကြောင်း သိရသည်။
မက်ဂရီဂေါ်နှင့် ပိုရီယေးတို့ ဒုတိယအကြိမ်ဆုံတွေ့သည့်မကျေပွဲကို တနင်္ဂနွေနေ့ (မြန်မာစံတော်ချိန်) နေ့လယ်ပိုင်းက ယူအေအီးနိုင်ငံ အဘူဒါဘီမြို့၌ ကျင်းပရာ ဒုတိယအချီ နှစ်မိနစ် ၃၂ စက္ကန့်တွင် ပိုရီယေးက အလဲထိုးနိုင်ပွဲရရှိခဲ့သည်။
ယင်းပွဲမှာ မက်ဂရီဂေါ်အတွက် ကစားသမားဘဝ ၂၇ ပွဲထိုးသတ်ရာတွင် ငါးပွဲမြောက် ရှုံးပွဲကြုံတွေ့ခြင်း ဖြစ်ပြီး အလဲထိုးဖြင့်ရှုံးနိမ့်ခြင်းမှာမူ ပထမဆုံးအဖြစ် မှတ်တမ်းဝင်ခဲ့သည်။
မက်ဂရီဂေါ်သည် ရှုံးပွဲကြုံတွေ့သော်လည်း ထိုးကြေး ပေါင် ၃ ဒသမ ၂၅ သန်းနှင့် Pay-per-view ရောင်းချခြင်းမှ ပေါင် ၁၄ ဒသမ ၆သန်းအပါအဝင် စုစုပေါင်း ပေါင် ၁၈ ဒသမ ၂၅ သန်း ရရှိမည်ဖြစ်ကြောင်း ဗြိတိန်အခြေစိုက် Daily Mail သတင်းဌာနက ဖော်ပြသည်။
UFC ပြိုင်ပွဲဥက္ကဋ္ဌ ဒေနာဝှိုက်ကလည်း UFC 257 မှာ ပြိုင်ပွဲသမိုင်းတစ်လျှောက် Pay-per-view ရောင်းချရမှု အများဆုံးပွဲတစ်ပွဲဖြစ်ကြောင်း ထုတ်ဖော်ပြောကြားထားသည်။
သို့သော် ယင်းပွဲအတွက် မက်ဂရီဂေါ်ရရှိမည့်ပမာဏမှာ ၂၀၁၇ ခုနှစ်က အမေရိကန်လက်ဝှေ့သမား မေဝယ်သာနှင့်ထိုးသတ်စဉ်ကရရှိခဲ့သည့် ပေါင် ၉၄ သန်းထက် ငါးဆကျော် ပိုနည်းကြောင်း သိရသည်။
၎င်းအား အနိုင်ရခဲ့သည့် ပိုရီယေးမှာမူ ထိုးကြေးအဖြစ် ပေါင် ၇၃၀၀၀၀ နှင့် Pay-per-view ရောင်းချခြင်းအတွက် အချိုးကျခံစားခွင့်သာရရှိမည် ဖြစ်ကြောင်း သိရသည်။
ပိုရီယေးသည် ၂၀၁၄ ခုနှစ်က ထိုးသတ်ခဲ့သည့် UFC 257 ပြိုင်ပွဲတွင် မက်ဂရီဂေါ်အား ပထမအချီ နှစ်မိနစ်မပြည့်ခင်မှာပင် ရှုံးနိမ့်ခဲ့သည့်ရှုံးကြွေးကို ပြန် ဆပ်နိုင်ခဲ့ခြင်းဖြစ်သည်။
ပွိုင်ရီယာသည် ၃၄ ပွဲထိုးသတ်ရာတွင် ၂၇ ပွဲ အနိုင်ရပြီး ခြောက်ပွဲ ရှုံးနိမ့်ထားသည်။
