လီဗာပူးလ်အသင်းသည် ပြီးခဲ့သည့်ရာသီ ချန်ပီယံလိဂ်ဖလားပိုင်ရှင် ဘိုင်ယန်မြူးနစ်အသင်းတွင် ခြေစွမ်းပြခဲ့သည့် ကွင်းလယ်လူ သီယာဂိုအယ်လ်ကန်တာရာအား ခေါ် ယူထားပြီးနောက် သီယာဂိုပွဲထွက်ကစားခဲ့သည့် ပွဲစဉ် (၅)ပွဲစလုံး နိုင်ပွဲမရရှိသေးသည့် အခြေအနေနှင့် ကြုံတွေ့နေရကြောင်း သိရှိရသည်။
သီယာဂိုအယ်လ်ကန်တာရာသည် မန်ယူအသင်းနှင့် ကစားခဲ့သည့် FA ဖလားပွဲစဉ်အပါအဝင် လီဗာပူးလ်အသင်းအတွက် ပွဲထွက်ကစားခွင့်ရသည့် (၅)ပွဲတွင် (၂)ပွဲသရေ၊ (၃)ပွဲရှုံး ရလဒ်ဖြင့် ကြုံတွေ့နေရပြီး ဆိုရှယ်မီ ဒီယာအသုံးပြုသူများ၏ လှောင်ပြောင်မှုများနှင့်လည်း ရင်ဆိုင်နေရသည်။
သီယာဂိုအား ဘေးတိုက်ပေးဘောလုံးများဖြင့်သာ အချိန်ကုန်နေသူဟု ဆိုနေကြပြီး အချို့ပရိသတ်များကလည်း လီဗာပူးလ်ကို စွန့်ခွာကာ ဘိုင်ယန်မြူးနစ်သို့ ပြန်သင့်သည်ဆိုသည့် မှတ်ချက်စကားများ ဆိုခဲ့ကြသည်။
သူသည် ယခုရာသီတွင် ပရီးမီးယားလိဂ်ပွဲစဉ် (၄)ပွဲနှင့် FA ဖလားပွဲစဉ်တစ်ပွဲကိုသာ ပွဲထွက်ခွင့်ရရှိခဲ့ခြင်းဖြစ်ပြီး၊ ဒဏ်ရာပြဿနာများကြောင့် ယခုရာသီပွဲစဉ်အတော်များများကို လွဲချော်ခဲ့သူဖြစ်သည်။
သီယာဂိုသည် မန်ယူအသင်းကို (၂-၃) ဂိုးဖြင့် ရှုံးနိမ့်ခဲ့သည့်ပွဲတွင်လည်း ဘရူနိုဖာနန်ဒက်စ်၏ အနိုင်ဂိုးဖြစ်သည့် ဖရီးကန်ကန်ချက်ကို ကာကွယ်ပုံနှင့်ပတ်သက်ပြီး ဝေဖန်မှုများနှင့် ရင်ဆိုင်နေရသည်။
ဘရူနိုဖာနန်ဒက်စ်၏ ကန်ချက်သည် သီယာဂိုရပ်နေသည့်နေရာကို ဖြတ်သန်းခဲ့ချိန်တွင် သီယာဂိုက ခေါင်းငုံ့ရှောင်ပေးခဲ့ခြင်းကြောင့် ဂိုးဝင်သွားခဲ့ခြင်းလည်း ဖြစ်သည်။
ယခုရာသီ သီယာဂိုပွဲထွက်ကစားသည့် လီဗာပူးလ်အသင်း၏ ရလဒ်များ
အဲဗာတန် ၂-၂ လီဗာပူးလ် (ပရီးမီးယားလိဂ်)
ဆောက်သမ်တန် ၁-၀ လီဗာပူးလ် (ပရီးမီးယားလိဂ်)
လီဗာပူးလ် ဝ-၀ မန်ယူ (ပရီးမီးယားလိဂ်)
လီဗာပူးလ် ဝ-၁ ဘန်လေ (ပရီးမီးယားလိဂ်)
မန်ယူ ၃-၂ လီဗာပူးလ် (FA ဖလား)
