အာဆင်နယ်အသင်းနည်းပြ အာတီတာက အသင်းတွင် ဂျာမန်ကွင်းလယ်လူ အိုဇေးလ်၏ ဖြစ်ရပ်ကဲ့သို့ ဖြစ်ရပ်မျိုး ထပ်မံအဖြစ်ခံမည်မဟုတ်ဟု ပြောကြားခဲ့သည်။
အာဆင်နယ်အသင်းသည် အသင်းတွင် လစာငွေအများဆုံးကစားသမားအဖြစ် တစ်ပတ်လျှင် ပေါင်(၃)သိန်းခွဲခန့် ပေးနေရသော အိုဇေးလ်အား ပြီးခဲ့သည့်တစ်နှစ်နီးပါး အသုံးမ ပြုခဲ့ဘဲ ယခုမှ စာချုပ်ကိုအဆုံးသတ်ကာ တူရကီကလပ် ဖီနာဘာချီအသင်းသို့ ပြောင်းရွှေ့ခွင့်ပေးခဲ့ခြင်းဖြစ်သည်။
အာတီတာက မိမိတို့ အာဆင်နယ်အသင်းအနေဖြင့် အိုဇေးလ်၏ ပြဿနာကို သင်ခန်းစာယူကာ ယင်းကဲ့သို့ုဖြစ်ရပ်မျိုး ထပ်မဖြစ်စေရန် ကြိုးစားရမည်ဖြစ်ကြောင်း ပြောကြားခဲ့သည်။
”ခင်ဗျားတို့ဆိုရင်လည်း ဒီလိုအဖြစ်မျိုးထပ်ဖြစ်မှာကို လိုလားမှာ မဟုတ်ပါဘူး။ ဘယ်ကစားသမားဖြစ်စေ၊ ဘယ်ကလပ်အသင်းဖြစ်စေ ဒါမျိုး မဖြစ်ချင်ကြပါဘူး။ ဒါပေမဲ့ ကလပ်အ သင်းတိုင်းအနေနဲ့ ဒီလိုဖြစ်ရပ်မျိုးကို အနာဂတ်မှာ ဒီထက်ပိုကြုံရနိုင်ပါတယ်။ တကယ်တွေ့ကြုံလာချိန်မှာ အားလုံးပွင့်ပွင့်လင်းလင်းရှိဖို့ လိုအပ်ပါတယ်။ အိုဇေးလ်လို မဖြစ်အောင် အမြန်ဆုံး ကာကွယ်ဖြေရှင်းရမှာပါ။ ဇာတ်မျောကြီးအဖြစ်မခံဘဲ၊ အခြေအနေကို အနှောင့်နှေးမခံဘဲ ဆုံးဖြတ်ချက် မြန်မြန်ဆန်ဆန်ချရမှာပါ”ဟု ပြောကြားခဲ့သည်။
အာဆင်နယ်အသင်းသည် ယခု ဇန်နဝါရီအပြောင်းအရွှေ့ကာလအတွင်း အိုဇေးလ်ကို စာချုပ်ဖျက်သိမ်းပြီး လမ်းခွဲခဲ့သလို၊ ဂရိ၀ါရင့်နောက်ခံလူ ဆိုကရာတစ်ကိုလည်း ပြီးခဲ့သည့်ဇန် နဝါရီ(၂၀)ရက်နေ့က စာချုပ်ဖျက်သိမ်းခဲ့ကြောင်း သိရသည်။
