ဘာစီလိုနာတိုက်စစ်မှူးဟောင်း အီတူးက မက်ဆီ၏နေရာကို ဆက်ခံမည့်သူမှာ လူငယ်တိုက်စစ်မှူး အန်ဆူဖာတီဖြစ်ကြောင်း SPORTbible နှင့် ပြုလုပ်သည့် အင်တာဗျူးတွင် ပြောကြားခဲ့သည်။
လာမည့် ဇွန်လ (၂၄) ရက်နေ့တွင် အသက် (၃၄)နှစ်ပြည့်မည့် Ballon d’Or (၆)ကြိမ်ရ မက်ဆီသည် ယခုရာသီကုန်တွင် ဘာစီလိုနာအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး အသင်းမှ ထွက်ခွာဖွယ်ရှိသည်ဟု သတင်းထွက်နေသူဖြစ်သည်။
အီတူးသည် ဘာစီလိုနာအသင်းတွင် မက်ဆီနှင့် (၅)ရာသီ တွဲဖက်ကစားဖူးသူဖြစ်ပြီး အန်ဆူဖာတီမှာ ဘာစီလိုနာအသင်း၏ အနာဂတ်ဖြစ်သည်ဟု ပြောဆိုခဲ့ခြင်းဖြစ်သည်။
အီတူးက ”အနာဂတ်မှာ မက်ဆီရဲ့နေရာကို ဆက်ခံမယ့်သူက အန်ဆူဖာတီလို့ ကျွန်တော် ထင်ပါတယ်။ သူဟာ အံ့အားသင့်ဖွယ်ခြေစွမ်းကို ပိုင်ဆိုင်ထားပြီး ဘာစီလိုနာအသင်းအနေနဲ့ သူ့ကို သေချာဂရုစိုက်ပျိုးထောင်သင့်ပါတယ်”ဟု ပြောကြားခဲ့သည်။
